【嫁到這世界邊端】陳貝兒每集爆喊：唔係觸景傷情 只係touching
過去1個星期晚上播出嘅TVB節目《嫁到這世界邊端》，爆點並唔係節目中一班香港女仔嫁去外國有幾幸福，焦點幾乎放在主持陳貝兒（Janis）被爆出與結婚6年的老公離婚一事，Janis在節目中見到其他人咁 sweet，自己卻失婚，難免有點感觸， 陳貝兒接受《香港01》電話訪問時卻表示，「當時喊到豬頭並唔係觸景傷情，而係觸景touching，見到佢地咁開心我都好感動，我嘅眼淚係替人開心嘅眼淚。」她其後透露與前夫關係良好，仲話自己對愛情仍有憧憬，強調「一次唔開心，唔等於一世都唔開心。」
節目播出後，Janis幾乎每晚都會同網友在Facebook同Big Big Channel開足3小時live，網友的留言大部分都是為她打氣， Janis表示十分感激大家的關心，並透露自己已經恢復得七七八八，「每一晚同網友開live，佢地真係俾咗好多力量同支持我。如果無佢地，我又係一個人係屋企，對住四面牆，同佢地傾偈感覺就好似有人陪住。」咁是否真的寂寞到開足3個鐘live？難免令人覺得她放不低離婚一事，Janis就澄清話，「我地好想知道觀眾嘅意見，其實果個係交流平台，點解講到咁夜呢？因為節目到11點做完，好多次我都話bye bye大家喇咁，但佢地好踴躍，反正我又未瞓，如果有呢嗰需要繼續傾咪繼續交流下咯。」
至於live中Janis播的歌好似每首都不是情歌而是慘情歌，她表示，「唔開心嘅時候都會聽失戀慘情歌，歌詞字裏行間有好多共鳴，我覺得唔需要去逃避，都係抒發心情嘅一個方法。而live入面大部分歌係網友要求點播嘅，佢地想聽咩歌就播，如果夜晚想聽《紅日》咁亢奮我都配合，而我都有自己嘅playlist，大部分係抒情歌。」而昨晚校長譚詠麟都有亂入Live瘋狂留言，其後Janis表示，對方知道她離婚一事後都有安慰她。
對於今次節目《嫁到這世界邊端》有咁大迴響，Janis話自己同節目組都無諗過，提到當時拍攝節目時，節目組是否已經知道她離婚？Janis就話，「我當時接呢嗰job都無特別同公司公開講呢件事（離婚），其實我都唔好意思，因為嗰陣我都處理件事，但拍攝嗰陣成班工作人員見到個主持突然爆喊都覺得好奇怪。同成個節目組係親密嘅戰友同互相信任，佢地當時知道件事之後夜晚都摸住酒杯底交下心。」但今次在節目臨出街前才被爆與丈夫離婚，不少網友都質疑係節目宣傳技倆，陳貝兒都有聽講過，「其實要俾人知嘅時候都係蓋不住。（但似乎重點放得太多係離婚事件上？）當然我都唔想將私事公開講，但到被其他人知我都唔想刻意隱瞞同講大話。」
陳貝兒指當時同丈夫要決定離婚，都覺得好不捨得，「當時要下這個決定大家一齊要行這一步的時候，當然係好唔捨得，覺得好可惜，始終相識係一種緣份，成為夫妻都係好珍貴嘅一件事，但最後都係一齊行唔到落去，要終結係好唔捨得。」至於當時哪個提出離婚，Janis就未有透露，「我地係性格不合而分開。」而她與前夫現在關係良好，「我地係朋友，都有同對方家人聯絡，始終都相識咁多年，有需要嘅時候都會互相支持。」現時正在與前夫辦理離婚手續嘅Janis，在分居這一年亦無特別到外地散心，「因為都要工作，但最感激身邊一班好姊妹同姊姊，給了我好多力量。」
當年僅僅拍拖1年就結婚，現在卻離婚收場，會否覺得當時太快決定結婚？她說，「我覺得唔係時間問題，係要講好多方面。」現時與家人同住的Janis透露在分居期間，家人是自己強大的避風港，「媽咪係一個好好嘅聆聽者，可以話係陪着我走，佢係我身邊已經好足夠。」咁現時有無追求者？Janis笑言身邊好姊妹仲急過自己，「我係啱啱公開單身status，但好姊妹就話我就快重出江湖，喂我唔係重出江湖，我連隻腳都未踏入江湖呀。雖然我知道佢地係想我快啲搵到。」Janis就話好enjoy單身生活，「一個人其實都可以好開心，而家做嘢同埋大家鍾意個節目都係另一種快樂。」咁準備好投入新戀情未？她表示採觀望態度，「仲適應緊而家單身嘅身份，enjoy下自己嘅生活。」