【同盟】胡定欣做進化版刁蘭 完咗先feel到好過癮：拍時好氣餒
近排每到星期日就會有TVB劇集《同盟》嘅宣傳活動，今日亦唔例外，早前遠赴澳洲兩星期拍攝節目嘅胡定欣同姚子羚今次終於回歸，一齊同鮑起靜、陳展鵬及陳山聰等《同盟》演員現身馬鞍山同粉絲見面！呢套劇一播出唔少觀眾都同去年嘅《城寨英雄》比較，定欣就話拍《同盟》辛苦勁多：「之前係功夫，又巴西柔術又MMA又槍，全部由零開始學過，所以今次係進化版嘅刁蘭。」
攝影：溫菁莉
提到上星期四嗰集，影到定欣打到周身瘀，真係見到都心痛，她笑言拍嘅時候係有用化妝品遮蓋，「但係水入面沖沖下就無晒，但有瘀痕起碼證明我有拍過動作戲先喇。」定欣坦言當時拍攝嘅時候都好氣餒，「我可以話《同盟》入面有95%嘅動作都係親身上陣，好多時候動作做極都唔好，就會有力不從心嘅感覺。」她指自己都有好大進步空間，至於係咪想朝「打女」進發？定欣就認為，「無話我想唔想做打女，而係我覺得如果觀眾覺得我適合handle呢啲角色，其實我係好開心去迎接呢啲挑戰。」其後續道，「入行10幾年，可能有好多監製都見到我有舞蹈底子，都會加入一些動作嘅元素晌我角色。但挑戰一次比一次大，我又學咗好多新嘢，都覺得好過癮。」定欣坦言今次角色比刁蘭瘋狂，唔怕外界將兩個角色比較，「大家會睇到動作比上次難度高，觀眾都見到唔同嘅演繹方法，始終背景年代都唔同。」
講返活動上定欣同陳展鵬就玩遊戲，期間更被其他演員要求陳展鵬跨過定欣嘅身體，問到會否feel到尷尬？定欣就話無，「大家唔好再朝住呢啲去談論，對媒體嚟講，可能係一個話題，但大家要講嘅要答嘅已經答過，每一次答案都一樣。唔通大家真係想見到我地尷尬先開心咩？既然我地咁辛苦去拍呢套劇，希望專注於劇集上，而唔係題外話。」至於她之前與一班好姊妹到澳洲拍攝節目《胡說八道去旅行》，定欣都話超級難得，「我前幾日先返，但杏兒同豹嫂就仲係當地拍緊，我係好唔捨得，但我要返嚟宣傳劇集，都無辦法。」她直言私底下都好難可以一次過召集所有姊妹一齊去旅行，「個個都要開工，所以呢兩個星期我銘記於心。」
而有網友表示今次《同盟》會在下個月13/9（星期三)大結局，對於安排甚為不解。監製文偉鴻就表示，「因為當初原定播出時間是星期一至日，但後來公司希望星期一至五播，所以就在星期三做大結局。」