《同盟》68歲郭鋒3個打8個 唔用替身好霸氣：入嚟打你！
撰文：何志衡
出版：更新：
TVB新劇《同盟》係咪向功夫片致敬？繼陳展鵬同胡定欣打到反轉再反轉之後，昨日第5集就輪到郭鋒帶埋兩個仔黃長興、楊證樺入更衣室3個打8個，66歲嘅郭鋒依然好抽得，仲擺出李小龍嘅經典姿勢。同場嘅黃長興接受電話訪問時就大讚郭鋒，更指郭鋒完全冇用替身添！好勁呀！
郭鋒拍戲幾十年都拍過好多武打片，不過拳打腳踢呢啲招式比較少見，昨日《同盟》講郭鋒個仔黃長興同人踢波，點知對方球員出茅招整傷咗黃長興，所謂整傷其實只係隻腳流咗少少血，郭鋒一怒之下就拉埋黃長興同楊證樺殺入更衣室找晦氣。
郭鋒好霸氣咁講咗4粒字：「入嚟打你」就一手將對方推埋牆狂打，更衣室內其他人即衝埋嚟，郭鋒3人個個好似《古惑仔》洪興出身咁將對方8個人打到落花流水。郭鋒身手了得，出拳狠勁，睇落真係拳拳到肉，更多次發出李小龍式叫聲，果然寶刀未老，三扒兩撥就將對方全部打低。
喺戲入面飾演郭鋒二仔嘅黃長興接受《香港01》訪問時大讚郭鋒：「佢身手幾好㗎！我同佢之前都合作過，佢keep得好好！呢場戲佢唔使替身，喺鏡頭都見到佢個樣，你見到飛嚟飛去嗰啲都係被打嗰啲，佢哋就要用替身。」黃長興稱呢場打戲係要畀觀眾知道佢哋一家人好打得，之後仍然會有動作場面，但拳腳較少，多數揸槍咁話。
而早前郭鋒愛妻歐陽佩珊去世，黃長興等《同盟》演員都有慰問：「我哋有個group嘅，佢喺個group講咗佢屋企嘅事，我哋唔想打擾佢所以只係慰問咗句，佢話之後會約我哋出嚟食飯。」黃長興又透露佢飾演嘅韋以強會死，因而導致韋家同令家仇恨加深，但係詳情佢就唔肯講住，自己睇喎！