【同盟】姚子羚15年等一個機會 打到週身瘀：兩隻手痛到冇知覺！
《同盟》食住《城寨英雄》氣勢，收視平均26至27點，但最令人驚喜的是姚子羚，劇中飾演Kate，經常穿窄身性感吊帶，但又有不少高難度打鬥場面，令網友看得開心，她說：「其實我第一次拍咁多打戲，尤其喺車廂嗰場戲，我拍完兩隻手係瘀哂，痛到冇哂知覺，每次放工都週身痛，因為成日會打落啲鐵到，劇入面啲衫全部都係好少布，冇得帶pad，下下硬食㗎。」
姚子羚原名饒慧玲，名字由錢國偉改，在無綫捱了15年，2002年參加《TVB8全能主持比賽》拿了冠軍後入行，劇中即使被壞人、殺手夾擊，她都可以解決，但現實中任你幾好打，當演員始終被動，她說:「每個人條路都唔同，或者姚子羚就係要做十幾年先有而家嘅成績，我接受喎。」姚子羚出道的年代，無綫奉行「排櫈仔」制度，想做女主角，必須由跑龍套、再逐步上，好像林峯、楊怡都當個《創世紀》路人甲，隨著年資，戲份亦增加，不似近年陳凱琳、蔡思貝等港姐，一選完就做劇集女主角。
她說:「我覺得公司會有自己嘅決定，市場上要多元化，公司要培育新人係正常喎，每個人都需要機會，崗位唔同，大家做嘅嘢一樣，都係返咁多個鐘，你亦有自己嘅戲份，唔好框住自己我係舊人喎，新人一定唔好喎，唔可以咁諗，可能我已經演得有固定pattern呢，新人方式仲好呢？唔好有個心態係「嘩！我好資深喎，我一定好喎、要俾我做喎。」我諗邊一行都係有能者居之，唔好持住自己做咗幾多年，呢個心態我覺得唔好，永遠都係一個學習階段。」
「（其他港姐一出道就做主角，妳冇唔開心？）如果你哋旁觀者會問咁樣會唔會唔舒服？咁咪一個原動力令自己做得更好囉，與其花時間研究張宣傳海報，自己企喺邊？係咪好邊？係咪中間，邊個前過妳？不如做好我目前嘅戲，攞多啲時間落自己嘅劇本到，好過睇眼前張海報，點解我唔係企中間啦，我自己都做過新人，我都被人評擊過，反而有時同行呀、編審、監製行過，話睇過你做邊場戲，覺得我有進步呀，呢個肯定對我仲緊要，我當然都想獨當一面，但呢啲應該交俾觀眾決定啦。」
等了15年，今年姚子羚才強勢出擊，除了《同盟》之後播映的《燦爛的外母》，姚子羚戲份都重，但她不覺時間用多了，她說：「時間幾長唔係最大問題，過程有冇得著呢？呢段時間有起有跌，我覺得每一步都好實在，係咪兩年時間去到一個位（女主角）就叫最叻呢？去到呢個位唔係最叻，點樣係呢個位維持落去，或者突破再上，呢個先係最高深學問，大家只係起步時間唔同，或者大家達成嘅時間唔同，我可能會行得比人哋慢，但我行得好舒服喎。」