謝安琪失言激嬲網民　急道歉：表達得唔好希望大家唔好介意

曾幾何時有口痕網民稱呼Kay做「謝安肥」，不過Kay好努力鍛練身體同埋做咗天后之後就冇乜人再咁叫佢，而Kay生完大仔張瞻同埋4個月前囡囡KaKaBall張靖出世之後，Kay都修身得好快。不過日前佢出席同蕭潤邦（Oscar）合資嘅食店開幕禮時，被問到係咪諗住湊仔唔唱歌嗰陣就爆咗句：「而家真係好忙，又要湊女，又要做生意，加上而家咁肥，仲唱咩歌。」

就係呢句惹嚟咗網民批評，指Kay唔應該話肥人唔唱得歌，Kay知道自己失言，昨晚即喺fb貼文道歉：「Sorry sorry sorry，而要同大家解釋一下，我唔係覺得肥就唔可以唱歌，我表達得唔好希望大家唔好介意。我只係覺得我自己而家嘅狀態，無論身體狀況定係身形線條，都同平常工作時候既（嘅）我有一大段嘅距離，並唔係我心目中嘅演出狀態。」

Kay又解釋希望多啲陪屋企人：「現階段我好享受家庭生活，每日都同我好得意嘅囝囡有好多相處嘅時間，呢啲美好嘅時光對我來講非常寶貴，所以我唔會咗要工作對此設下一個期限。」即係暫時未有復出唱歌嘅時間。

「而我其實都只不過係啱啱生完妹妹幾個月，我希望可以循序漸進慢慢咁回復狀態，如果有一日我返嚟，我希望以最佳嘅狀態同你見面為你唱歌，一言為定，好嗎？」家庭同事業比較，暫時Kay都係揀家庭多啲。

聲明一出，網友反應好擁躍紛紛留言支持佢：「唔好理啲嘈（噪）音，做好自己就得」、「我願意等，不要着急」、「明你嘅人唔使解釋咁多」、「雖然等得好心急，唯有loop住啲舊歌先！」咁多人支持，Kay安心晒啦！