拳賽｜梁敏巧獲Babyface公開致謝感開心：乜佢唔係同阿儀一齊咩

《東張》女神梁敏巧（Maggie）今日（6/1）現身電視城出席《萬千星輝頒獎典禮2024》「最佳男、女新人」5強候選人記者會。提到日前Babyface在《培生擂台：無敵盃》拳賽迎戰魔筋斌叔，被對方多次打至坐低，長期處於挨打狀態，到最後裁判以安全為由終止了比賽，判魔筋斌叔獲勝。Babyface在台上不忘多謝梁敏巧：「多謝你令我不停進步，我會繼續努力！」惹起全場歡呼拍掌聲。

Maggie接受《香港01》訪問時表示：「其實我朋友都有傳片俾我睇，成3分鐘我係睇晒，我覺得佢都算打得好好啦。（係咪打得少？）哈哈，雖然我睇片見佢都係挨打狀態，咁但係佢係有堅持嘅。（覺得佢打得敏唔敏捷？）我知佢練咗好短時間，咁所以係有進步嘅空間。（佢喺台上多謝你！）其實都開心嘅，咁恭喜佢，可以突破自己。（佢仲記掛住你，未放得低你！）係咩，乜佢唔係同緊阿儀一齊咩？我以為佢同阿儀拍緊拖喎。（所以你傷心到而家？）我冇傷心，佢開心就得㗎啦。」