看不見的收益：日本全國高中足球大賽
好多本地球迷慨嘆港足少新人、難接班，既然係咁何不由學界足球賽事做起？試諗下，如果有機會喺坐滿全場嘅大球場比賽，對青少年嚟講會係一件幾振奮嘅事？
文：列奧C@世界波
2016年1月11日，喺日本東京市郊埼玉縣曾經舉辦過世界盃準決賽嘅「埼玉2002體育場」，聚集咗54,090名觀眾。佢哋嚟唔係睇國家隊賽事、唔係睇J-League榜首大戰，亦都唔係睇天皇杯決賽，人群有老有少，佢哋入場都只係為咗睇一場中學足球決賽——「第94屆日本全國高中足球大賽」（第94回全国高校サッカー選手権大会）。
縱然近年國際賽成績下滑，西亞足球急促發展，但日本同澳洲仍然穩為亞洲足球兩大龍頭，而日本優勝嘅地方亦都在於出色嘅青訓系統，人才輩出。而喺日本足球青訓系統之中，除咗球會訓練之外，校園足球就係另一個重要嘅搖籃。
但係同日本相比，學界足球賽事喺香港嘅重視程度簡直堪稱「天與地」。喺連運動都要有獎先有資源嘅香港，「青訓」呢啲唔係即食、唔會立刻帶嚟回報嘅嘢，當然唔會係「重中之重」啦。
咁點解日本又會將一項本身只係「中學雞」嘅活動，發展成舉國矚目嘅賽事呢？
看不見的收益：未來
日本高中歷年訓練出唔少球星，除咗最為人熟悉嘅中田英壽（韮崎高校）之外，本田圭佑（星稜中學校）、中村俊輔（桐光學園）、長友佑都（東福岡高校）、岡崎慎司（滝川第二高校）、大迫勇也（鹿兒島城西高校）、遠藤保仁（鹿兒島實業高校）、柴崎岳（青森山田高校）、大久保嘉人（國見高等學校）等等，都係喺高中足球比賽有優異表現而為人注目。
以柴崎岳為例，雖然喺2010年第88屆日本全國高中足球大賽屈居亞軍，次年無緣決賽，但出色表現就令到J-League強隊鹿島鹿角提出邀請，2011年已經馬上於聯賽中上陣。當然仲有少年時期被橫濱水手放棄嘅中村俊輔、連大阪飛腳二隊都無緣升上嘅本田圭佑，同樣喺高校足球賽事入面被發掘出嚟。
以上屆冠軍東福岡高校為例，足球部就有280名部員，規模比不少職業球隊更加龐大。
喺香港，近兩屆港超同樣有唔少球星都曾經喺學界賽事大顯身手：杜瀚滔、葉頌朗、黎耀昌及楊賜麟（董之英）、麥基（英皇佐治五世）、方柏倫（喇沙）、梁冠聰（譚李麗芬）、李嘉耀（聖芳濟各）和曾文輝（元朗遵理）等等。
假如學界賽事水準不斷提升，相比名存實亡嘅「菁英杯」同預備組賽事，競爭力同吸引力都絕對較高。
看不見的收益：金錢
以上屆日本全國高中足球大賽為例，觀眾都要自費購票入場，另外全國共有43間日本電視台轉播，無論現場還是收看轉播，觀眾人數都遠遠拋離J-League甚至國家隊賽事，可以話係唔愁搵唔到贊助商。
喺香港，唔好講話比賽地點搵一個好啲嘅真草足球場，或者官方幫你做Facebook直播，就連決賽時間都可以係星期一、二下午呢啲普通學生返學時間（雖然今屆決賽係2017年3月5號星期日舉行），咁又點樣可以吸引到人去睇呢？
看不見的收益：學校
日本高中足球每年都有40幾間電視台轉播，各大名門都想把握機會宣傳自己，最好方法係咩？當然係冠軍。而各地方政府對學校嘅「進取心」通常都會大加鼓勵（呢一點香港就真係跟得好足）。曾經有縣政府喺學校獲得冠軍之後，頒授全隊球員榮譽獎。
喺今時今日咩都爭一餐嘅香港，對學校嚟講有咩比用90分鐘令全香港都認識你更化算？當然，一切都係建基喺賽事搞得有聲有色之上。
看不見的收益：足球推廣
一項問卷調查結果顯示，連續6年日本嘅學前兒童至小學生都將「職業足球員」排喺未來志願嘅第1位。
喺香港呢？家長會話冇前途、青年會擔心三餐。冇錯，佢哋只係視足球為課外活動，但每當自己嘅小朋友有比賽，家長都會到場支持（甚至比教練更加緊張）、同學朋友會到場打氣、校長老師會到場觀戰。
姑勿論一場學界比賽可唔可以改變到大家心態，但最基本提升到佢哋入場觀賞嘅意欲。「鳳凰計劃」耗費巨大，又吸引到幾多人入場？
好多本地球迷慨嘆港足少新人、難接班，既然係咁何不由學界足球賽事做起？試諗下，如果有機會喺坐滿全場嘅大球場比賽，對青少年嚟講會係一件幾振奮嘅事？
（文章純屬作者意見，不代表香港01立場。）