足球小將造就日本足球發展？
如果要搵地球上影響力最大嘅足球漫畫，睇怕都非高橋陽一嘅《足球小將》莫屬。
雖然近年無論係劇情、必殺技同畫功方面都嚴重崩壞，但你唔好理，遠至身處地球另一邊嘅費蘭度托里斯、沙治奧阿古路同「大恩」恩沙基都據聞係睇《足球小將》長大。
作為漫畫大國，動漫喺日本嘅地位已經超越咗一本書，從中可以睇到日本國內潮流同國民諗法，就算係足球動漫都唔例外。
迷信「Playmaker」？
高橋陽一1980年開始繪畫《足球小將》，故事入面無敵主角首推當然係戴志偉同麥泰萊，一個扭十個、中圈遠射、超闊視野，再加埋主角「一個救全家」嘅光環，係當時無數小朋友嘅偶像，以致踢波嗰陣都爭住打中場、著10號。「戴志偉」同「麥泰萊」某程度上亦反映當時日本足球界對「Playmaker」嘅嚮往；而更深層影響，就係令日本足球進入咗盛產「Playmaker」嘅年代：較遠嘅有小野伸二、中田英壽、中村俊輔，而近年就有香川真司同本田圭祐、清武弘嗣、乾貴士、武滕嘉紀等等。喺嗰一代日本國民心目中都相信，只要喺一個出色嘅「Playmaker」帶領之下，就可以有挑戰世界嘅本錢。
尤其當2002年日韓世界盃嘅時候，只係第二次打入決賽周，日本喺小野伸二、中田英壽、稲本潤一嘅「黃金中場線」引領之下，已經打入16強，只以一球不敵當屆季軍土耳其。當時有好多人都認為《足球小將》係令當代日本出現大量優質攻擊中場嘅原因之一。
但喺2014年世界盃，日本一場不勝，只攻入兩球情況下小組包尾出局。引以自豪嘅中場線完全發揮唔到水準。其實日本足漫對「中場」球員嘅刻劃亦都唔再係停喺對「Playmaker」嘅推崇。
《球場幻想曲》入面嘅攻擊中場近藤敦以力量同身體對抗性為賣點，更類似現代嘅歐陸式中場，而另一角色森川龍司亦似足現代嘅「墜後組織中場」（Deeplying Playmaker）；而筆者高度推薦嘅另一部漫畫《逆轉監督》（可惜香港已經停刊……），主角樁大介雖然缺乏自信，但有飛快速度同驚人體力，雖然係踢防守中場，但隨着劇情發展經常愈攻愈前，來回敵我禁區之間，正正係現今足球陣式最重要位置，亦係日本隊缺乏嘅「Box to Box中場」。
或多或少，其實都已經反映日本國內開始明白到足球大勢已經改變，以往「10號仔」一個救全家嘅時代已經有所改變。
「小志強」迷思？
講到《足球小將》嘅第三主角，唔使諗都會即刻叫出「小志強」嘅名，一個就算唔計佢可以射隻老虎出嚟，淨係可以同外國人比拼力量不落下風呢點，都知只會喺漫畫入面出現嘅角色。往年日漫之中總係會見到一個「屈高」、衝撞力強嘅中鋒：《足球小將》小志強、《踢出我天地》葉恭介、《球場幻想曲》五代晃、陸奧武彥、《我們的足球場》寺本德二（雖然最後轉咗打後衛……），總之一定要有一個大隻佬做開路先鋒。日本人除咗對「Playmaker」有一種執著，同樣對大隻入球率高嘅中鋒有一種渴求。
但經過近幾年同強隊比拼落於下風嘅真實情況，唔難發現現實中日本都缺少一名高效前鋒，遠古時期嘅中山雅史只能喺日本國內「搵食」；三浦知良外流期間難以算得上係成功；02年世界杯嘅3大前鋒：鈴木隆行、叫做「高大威猛」嘅高原直泰、柳澤敦同前輩相比更加不堪；之後嘅卷誠一郎、玉田圭司更加係講起都唔會有印象；直到近年先有岡崎慎司出現，但除咗勤奮之外，入球率不算出眾，今年已經喺球會失去正選位置；柿谷曜一郎同大迫勇也表現似乎亦未如預期，對國家隊嚟講同樣係一大危機。
可能係認清現實，又或者日本漫畫家都要突破，近年日漫之中嘅前鋒都開始有所轉變。令筆者最深印象係而家日本大熱，由伊賀大晃同月山可也一齊創作嘅《足球騎士》，主角逢澤驅除咗走「草食系」路線，亦都無健壯身形，靠嘅係門前嘅「嗅覺」同出色走位；《球場幻想曲》主角坂本轍平亦都係以輔鋒出現，最後同沖田薰以雙輔鋒陣式上場；香川真司都推薦嘅《BE BLUES!〜青になれ》（可惜無出中文版……）主角一条龍經歷重傷復出，同樣無身型優勢，除左近以前鋒掛帥之外，其實更加係類似現代嘅內切翼鋒。
不如諗下用中堅做主角啦！
老老實實，要同世界列強一爭長短，防守比進攻更重要。睇吓2014年世界盃，就算日本有一球在手，但係只要科特迪瓦「爆seed」（正確黎講係杜奧巴「爆seed」），已經徹底擊潰日本隊防線。
與其諗點樣進攻，不如從根本着手。畫一部用中堅做主角嘅漫畫，睇下有冇可能吸引到更多小朋友向中堅位置發展咪仲好！
（本文純屬作者意見，不代表香港01立場。）