【職場哀歌】賣命救全組　同事卻hea做　點解豬隊友總係跟住你？

事隔兩個月，無論係球迷與否，都應該記得全世界熱話NBA總決賽，即使Lebron James如有神助攻入50分，卻被豬一樣隊友JR Smith發夢而葬送勝仗。其實，在整個季後賽，Lebron所在的騎士隊一直被指係Lebron的一人球隊，隊友只會嘻嘻哈哈，吃喝玩樂，碌碌無為。

其實，何止球場，人生何處不是這種一人Carry成條Team的情況？

所謂Free-riders，打從中學時期做Group Projects開始存在，一組幾個人，往往其實就得1-2個人真係落手落腳做嘢，其他人自然坐享其成。到出來做嘢，呢個情況依然持續，持續得很自然。人性，可能本來就係懶惰。

咁究竟一個人Carry成條Team係咩體驗？

當你係一個項目的小頭目，分派工作俾幾個人，事前已經將成個Project從頭到尾分析並講解過，根據每個人的志向與能力，設定了每個人的工作範圍及時間，以為事情即將辦好，點知Deadline到時，有人交功課，但完全係不經思考的行貨，但起碼有交功課，亦有人表示因為A,B,C,D,E原因而未能完成，要多些時間，亦有人完全忘記了要做乜，一臉茫然。

結果，你要一人OT通頂完成所有人的未完成工作。

呢個時候，你簡直想炒晒全世界。你在思考，究竟呢啲人出糧做過乜嘢？

你亦達到一個政治不正確的推論：

1) 　人確實有高低之分
2) 　正是呢啲低端隊友拖了你後腿，如果唔係你肯定表現更好。

當你幾乎每個Waking moment都在Actively思考如何做得更好，而非發白日夢，而且一步一步從零開始創造各種項目的雛形時，你的隊友往往在看了3個小時YouTube、韓劇同9GAG，然後僅餘時間就係機械式地交行貨，彷彿人生只懂吃吃喝喝，去日本同埋淘寶：賺錢的侏儒，消費的巨人，唔識亦唔去深究如何創造價值，卻只懂消費使錢。

對此，我們固然感到憤怒，但亦值得想想，當初自己亦係「散仔」時，曾否都係咁有懶惰時候，有冇都係為咗趕着放工就求其交行貨？

或者呢個確實係人性「利益」的問題，問題係你有冇Ownership，無論係金錢上定係心理上。

假如得12k人工，而且無任何Incentivized remuneration，確實又好難期望人地會為你或公司賣命。

但心理上，確實見到，有些人本身就容易對工作有Ownership，其他人則否然。

但冇Ownership的人，會否係特別原因，例如佢未完全明白工作內容？或者身體唔太好？定係家庭有煩惱？公司提供的工作環境欠佳？

當然呢個始終都有性格因素，而且亦無謂阿Q精神地搵一百個理由（藉口），但可能，與其埋怨，倒不如努力嘗試解決呢個Ownership問題，或者真係可以激發對方的潛能與意志。呢個，可能係更成熟的做法。

正如Lebron James比賽後在記者會表示：

I am not giving up on JR Smith.

真正大將風範，不過如此。

SJ結語

有些人，叻到一個地步完全獨當一面，往往卻落得單打獨鬥；也有些人，能力看似平凡，卻有很多同道人為其打拼。或許，這就是人生的諷刺了。

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】

立即下載《香港01》，緊貼公務員職位空缺、勞工處筍工推介，了解CV、面試致勝技巧！
下載網址：
https://hk01.app.link/bkbJyY5t4O