【超時空香癡．上】港男愛上香 半年冇行街不夜歸：香雲好浪漫
Aaron是一位香藝師，亦是一位香癡，醉心研究香文化10年。香班課堂後，他收拾材料，包括用作播放Powerpoint的小電腦、所有學員的製香用具、自己心愛的香爐和裝飾用的假花。身穿恤衫西褲的Aaron提着兩大袋物品，有如水貨客掃完貨的模樣。每逢有香班的日子，Aaron就會帶着這些材料返工，一放工食個飯就趕去教班：「本來啲人叫我拎個喼，但係你拎個喼返公司，啲人又會話，你去旅行啊？」
香是鼻的食物
Aaron與香的關係，像陰陽眼，別人無法參透亦無法介入。虛無飄渺的香雲——燒香的煙如國王的新衣，他卻說：「睇住佢幻化，有陣時有唔同嘅款色，我就覺得好靚、好浪漫。」
若有風，煙不會向上升，幻想會破滅。炎炎夏日他寧關掉冷氣和風扇，任由汗滴流淌，一邊焗桑拿般欣賞香雲，並拍下香雲放上Instagram。 他每天放工回家，第一件事就是「品香」：「有時好攰你連隻眼都唔想擘大嘅時候，你聞到個香味，成個身鬆晒舒服晒好relax，好似人哋做massage都會聞到啲味放鬆晒，其實對我嚟講係享受。」他說香就如鼻的食物：「你無咗佢就覺得好肚餓，成日想聞住佢。令到你好好舒服嘅一樣嘢，我認為佢係生活之中必備放鬆嘅東西。」香不一定與祭祀有關，亦不是鬼神專享：「我本身係佛教徒，我玩香係因佛寺而起，但係唔關宗教事。我玩親嘅香，我唔係供佛嘅，都係要嚟畀自己聞。」
一「聞」鍾情 尋香、沉香
他和香的相遇與相愛，正是一場書生在破廟中遇上倩女幽魂的緣份。
「咁臭，攻眼攻鼻，咁都聞？」Aaron從前亦曾有這種想法。家中拜祖先，自少跟隨家人到文武廟和天后廟，所用的都是用雜木粉製成的廉價香，那些都是「攻眼攻鼻」的香：「所以我唔會因為去完個廟而對香有興趣。」直至中四那年，他跟家人到志蓮淨苑，Aaron嗅到一股與別不同的香味，一「嗅」鍾情：「𠵱隻香好正，我鍾意咗佢，我就諗住佢，要搵佢出嚟。」就這樣，他憑着那一瞬的記憶，如王子拿着玻璃鞋尋找灰姑娘，花了3、4個月時間，走遍全港香舖尋香：「見到任何一間都會衝入去。由最平嘅化學香，10蚊1束慢慢試上去。」
然而，卻碰不上那種香味。起初家人反對他點香：「怕我會燒咗間屋，我話我唔會，我一路都堅持。去到有一刻，佢哋就買咗個香爐同沉香畀我。」一點起那塊越南沉香，他就認出這是記憶中的香味：「非常之沉靜，我咁樣形容，平湖秋月。從一個非常之興奮，或者好激動、極端嘅時候，聞完之後你就覺得好放鬆晒，坐係度一嚿木咁。」而香有不同的味道，沉香適合夜闌人靜時品嚐，檀香味道辛辣、香甜，則較適合早上聞。湯水有分四時，香的材料亦可跟四時區分，例如肉桂行氣活血，較為適合冬天使用。
他得知是沉香後，在Facebook找到「救救土沉香」群組，認識到瀕臨絕種的土沉香，以及香港曾經販賣土沉香的歷史。雖然鍾情沉香，但Aaron亦無再增添：「我係更加珍惜，珍惜佢唔係燒咗佢，而係保留佢，第日可以聞。 除咗係香港嘅歷史，亦都係關係成個香文化。如果我用哂佢嘅話，即係將一個文化摧毀咗。」
造香如湊仔「瞓醒第一件事睇吓佢哋」
2007年剛愛上香時，他也只是去香莊買香，直到2011年才製作第一粒塔香：「因為你鍾意香，慢慢就會想自己一手一腳做，每一根你都覺得好感恩。」他自己到中藥舖買藥材，自行磨粉：「買返嚟自己搵個攪拌機磨，攪拌機都整爛咗幾個。」由於造香的中藥粉一定要幼細，否則線香就會斷開：「你又要篩，篩完又要磨，磨完又要篩。成日對住佢，整到成身都係，慢慢就會認得唔同藥材嘅味道。」除了檀香、柏香，他自己常用的香藥也有丁香、木香、藿香等等。
將一兩中藥磨成粉，起碼用上1小時，因此每一茶匙的香粉都得來不易，：「所以整香嘅時候我覺得如珠如寶。」但要成香，接上來還有60小時偎乾就濕的照料。
以製作線香為例，將香粉加水搓好，放入類似「唧筒」的工具後，一條條意粉般的香有了雛形。將香排密後，它們要60小時才能完全風乾。而線香每稍為風乾就會收縮，線香之間就會出現罅隙，若無即時將它們重新排密，線香就會彎曲。因此，造香的日子也不能夜歸，否則前功盡廢：「瞓醒第一件事就去睇下佢哋，放工返嚟又立即飛過去睇。」有時加班夜歸，線香彎了，他就只好濕水修復，輪迴等候。
香方如秘笈
每人可根據的自己的喜好，選擇材料調製香方，即使是同樣的材料，比例不同亦會影響味道：「其實香都好有趣，你可以創造屬於自己的香。」 然而，無一家香莊或廟宇會將自己的香方公開。Aaron到日本旅行的重頭戲，就是往不同的佛寺買香回來：「好好玩，好似猜謎語。當然無人會話個答案比你聽，但係你可以估完之後，就可以試下整返一樣出嚟。」 同樣是檀香，Aaron發現日本香味道更濃艷，原因是日本香另外再加了人工的香精。
立志推廣及保育香港的「香」文化
如是者，Aaron每天沉醉在香的世界。直至3年前，他在街市的香舖得知香港50年代已創立的「有利香莊」結業，他立即去西環的門市問個究竟。Aaron親眼見證本地香舖結業，意識到保育香文化的逼切性，使命感油然而生：「會唔會30年後，香港成為無香嘅港？為此，我有珍惜嘅嘢就要立即去做，我驚佢滅亡所以去搞唔同嘅香班。」
今年年初主動向不同機構提議開香班。這半年他因為要準備香班的材料，沒有逛過街。由於自行磨製藥粉太花時間，他改到中藥粉批發商買粉；同時又要訂購香爐，每天不是入粉就是驗貨：「成日搞到兩點幾，跟住第二日8點又起身，跟住放工又搞啲粉啊、香啊。」辛苦的背後，香癡Aaron懷有小小的願望：「希望啲人第日唔會再覺得香係古怪嘅嘢，唔會一見到佢就諗起拜神，可以慢慢融入喺生活之中。聞到香其實係一件好開心嘅事情，一種香薰嚟。」
Aaron的「怪」，不單只愛香，還有穿漢服、唱印度歌等等。千千萬萬種老氣的興趣，卻源於逃離孤獨。香，有沒有影響他的社交生活，還是讓他從孤獨的香爐中釋放出來，現實的戀愛又如何，下文再續：
【超時空香癡．下】 穿漢服彈琵琶 走古人之路 曾有孤獨的青春