【社區小小事】海洋公園內突然壞「車」　電動輪椅使用者求助無門

一般汽車在路上「跪低」，可以找拖車公司幫手拖走，再送入車房維修；惟電動輪椅若在路上故障，隨時叫天不應叫地不聞。20多歲殘疾人士阿鬼，早前就有過壞車的難忘經歷。
攝影：羅君豪

患有遺傳疾病強直性脊椎炎的阿鬼，數年前開始病情惡化，雙腿失去活動能力，需靠輪椅出入：「初初都可以用手推輪椅，但係搞到其他問題更加嚴重，對手有腕管綜合症，又痛又抽筋，要做手術，所以轉咗用電動輪椅。」

月前，阿鬼和家人到海洋公園遊玩時，他的電動輪椅在那被他形容為園內「最斜嗰段斜路」拋錨，「下晝三、四點停咗喺度，好無助，又曬又熱又暈。」一行人雖然曾向公園的保安求助，但在此情況下，保安也「做唔到啲乜」，唯有護送阿鬼到公園門口。

一行人亦曾聯絡輪椅公司求助，惟當天是週日，久候多時也收不到對方回覆。求救無門下，最後家人要以人手推動沉甸甸的電動輪椅，把阿鬼從黃竹坑推回天水圍家中，說起當時情況，他也替家人辛苦。

出街壞輪椅難求救

事實上，阿鬼的輪椅並非第一次故障，過往他曾在旺角鬧市中碰上「斷轆」的情況，而最驚險一次，要數他在過馬路、橫過輕鐵路軌時，輪椅突然停下來，不管做甚麼也無法令它前行、後退：「當時就喺路軌中間望住架輕鐵駛過嚟剎停，然後成班路人衝過嚟，推返我入行人路。」

不過，連人帶故障的輪椅被安置到安全地方後，下一步又該如何做？坊間針對輪椅故障的緊急拯救服務不多，即使有社企提供有關服務，阿鬼說也可能需及早預約：「但係你唔會知架車幾時壞，冇理由話提早一個禮拜你就打定電話，話下個禮拜我喺邊度壞車，冇可能㗎嘛。」

在保養期間，輪椅公司會負責輪椅的維修，但阿鬼說要在短時間內找到他們作緊急維修相當困難，有時打多次電話也未必有人接聽，即使在辦公時間內聯絡，亦不一定有職員可馬上出來處理。「有時佢會叫我影相俾佢(輪椅公司)睇，影邊度有事，跟住問返我知唔知架車咩事。咁如果我知，就唔使打畀佢哋啦。」他無奈續道：「影完相就要諗辦法搵人抬我返屋企，通常要自己再打去問，係唔係嚟維修、幾時會嚟，跟住自己約佢。會忟，但係冇辦法，你又唔可以逼佢過嚟。」

依靠團體互相幫助

為了令遇上突發情況的傷殘人士不至了無可依，路向四肢傷殘人士協會註冊社工陳梓言指，協會的職員和義工會針對這些「壞車」情況，為求助人提供緊急拯救服務：「我哋希望一啲喺街上突然壞車嘅會員，至少可以平安返到屋企先。呢個服務嘅次數唔可以話好多，但一個月都有大概三、四次。」

不論緊急拯救還是服務，陳梓言說兩者都受限於提供服務機構的辦公時間，亦正因如此，這些服務存在需求，卻又難以提供。「始終係緊急性維修，唔知佢咩時間發生，可能係喺平時繁忙嘅上班時間，或者係非辦工時間，未必咁易搵到人幫手。」而現時提供有關服務的非牟利機構，也只在有限資源下運作：「好想提供唔同嘅服務畀輪椅人士，但都有制肘。其實唔同組織嘗試為輪椅朋友貢獻，去幫佢哋做唔同嘅維修。」

他又指，輪椅過了保養期後，維修、購買零件的費用將會更高，並非所有傷殘人士都有經濟能力，負擔昂貴的費用。

幸運的第一次

說回輪椅在海洋公園「壞車」一事，阿鬼的朋友後來聯絡上路向四肢傷殘人士協會，而協會的職員和全身癱瘓的輪椅維修義工日禧得知他於翌日需覆診後，連夜趕到天水圍，為阿鬼維修輪椅，到修理好時，經已凌晨。輪椅下午故障，當天晚上就修好，如此快的維修經驗，阿鬼說是第一次。

修好輪椅、回到家門的一刻，阿鬼終收到輪椅公司的回音，着他先留下資料，公司明日再回覆。回想此事，阿鬼哭笑不得：「我喺度諗，如果我真係仲喺海洋公園，咁你聽日先覆，我真係要喺海洋公園過夜！」

對行動不便的阿鬼來說，輪椅有如他的雙腿，可以帶他離開家中那張床，到遠一點的地方：「冇輪椅嘅話，狀態好啲就瞓喺張床、對住個天花板打機。狀態差嘅時候，又係瞓喺張床度，成個人生嘅娛樂、日常生活就係望住天花板，數下上面有幾多粒塵。」不過，輪椅多次故障，又找不到人幫忙，多少也造成了打擊。「好少會出去遠嘅地方，今次去海洋公園都係畀屋企人逼。難得我鼓起勇氣走出去，但就搞成咁。」阿鬼無奈地說。