蔡瀚億獲提名金鹿獎男配　10月拍《狂舞派3》：角色有突破

蔡瀚億（BabyJohn）過去一年戲接戲忙個不停，2017年已經有6套參演電影上映，真係年頭見佢到年尾，早前終於放假去日本遊玩，直至近日返港突然收到一份非常驚喜嘅神秘禮物，就係憑《拆彈專家》中黃天諾一角，獲得第十四屆中國長春電影節「金鹿獎」提名「最佳青年男配角獎」。

今屆金鹿獎有15部入圍影片，《拆彈專家》係唯一一部入圍嘅香港電影，而今屆頒獎禮重點係鼓勵青年人才，蔡瀚億能夠被提名最佳青年男配角，亦係影展對佢嘅一種肯定和鼓勵，蔡瀚億話：「獲得提名，當然覺得開心。多謝長春電影節以及《拆彈專家》幕前幕後所有手足。可惜無法到現場感受氣氛，希望日後再有機會，可以親身到現場，所以依家繼續努力，拍好每部作品。」

BabyJohn嚟緊要拍黃修平導演嘅《狂舞派3》，呢部戲亦係佢同導演嘅成名作，黃金組合重現經典，BabyJohn自然十分重視，亦花好多心思籌備做足功課：「套戲10月就開啦，角色上喺劇本嚟睇已經突破咗第一集嘅框框，包括『柒良』呢個角色，而我哋前幾日整個班底都聚咗一次，發覺5年冇再聚，但互相好有默契，令我更期待開工。」蔡瀚億和黃修平再聚，大家傾劇本之餘，亦有男人的浪漫，蔡瀚億笑說：「我發覺我同導演都有顆少女心，我哋約咗一齊傾劇本，結果我哋兩個都點咗士多啤梨酒同埋食住cake咁傾，結果嗰一晚我哋傾咗六、七個鐘，但我哋仲未傾完，相信好快會再傾。」