【維尼與我】放負Eeyore緊張豬仔　原來維尼班朋友真正一面係咁

迪士尼經典角色小熊維尼面世近百年，至今仍擁有大批粉絲，除了造型夠cute之外，亦因為牠跟一班老友包括豬仔（Piglet）、跳跳虎（Tigger）、咿唷（Eeyore）、袋鼠媽媽（Kanga）、小荳（Roo）、瑞比（Rabbit）及貓頭鷹（Owl）等，各有不同性格，仔細留意一下，你的身邊都一定有這樣的朋友！

小熊維尼－為食仔

呆萌可愛的維尼是個忠誠和值得信賴的朋友，生活態度更是令身邊的朋友都能放鬆下來，但係人都有缺點，連小熊也不例外。見到小熊維尼，粉絲都會即時聯想到蜜糖罐，原著和動畫中亦因為經常四出想方設法搵蜜糖食而鬧出不少笑話，雖然肚腩仔好可愛，但為了健康，都係食少啲啦Pooh Pooh！

跳跳虎－冇時停

跳跳虎作為最受歡迎角色之一，人氣絕對不輸小熊維尼，但對牠來說應該沒有空理會這些虛名，事關跳跳虎根本一秒也停不下來，雖然有個這樣的朋友有時都幾攰，不過有活力係好事啊！

豬仔－緊張大師

另一人氣角色豬仔跟跳跳虎是兩個世界的動物，牠在朋友中是百分百的緊張大師，而且少少事都可以嚇到豬仔彈起，在森林中探險又經常慌張大叫，但隨着故事發展，驚驚青青的牠最終都發掘到自己勇敢一面，記住同身邊好似豬仔咁嘅朋友講，唔好放棄治療啊！

咿唷－放負怪

日常最愛放負的咿唷絕對不是得人鍾意的角色，想法消極到連收到豬仔送的生日禮物，都要再三確認先肯收，如果遇上這樣的朋友，不妨好似瑞比咁，出幾分力迫迫他。

瑞比－燥底王

講到燥底，瑞比認第二，冇其他動物敢認第一，作為想做就去做的行動派，瑞比一秒也不能等，不止上門找朋友時，未到門口已叫定門，更試過企圖撇甩冇時停的跳虎虎和貪玩的小荳，之後反而證實瑞比是口裏說不，實情是最熟悉朋友的一個。所以瑞比再燥底，大家都不會介意，朋友嚟㗎嘛。

袋鼠媽媽－母性爆棚

要珍惜願意照顧你的朋友，放在Pooh Pooh的小圈中，那個就是袋鼠媽媽。雖然她的注意力大多放在囝囝小豆上，但母性已深植在她的性格之中，如果有個好像袋鼠媽媽咁細心、溫柔的朋友，就唔好放手啦！

小荳－貪玩

袋鼠仔小荳是維尼小圈子中年紀最小的角色，亦充份表現了年輕的特色，牠對所有事物都充滿熱情兼有點笨拙的性格夠可愛，就算大家錫晒佢，都唔會有人妒忌。

貓頭鷹－懶叻

貓頭鷹在《維尼與我》戲份不多，喜歡牠的粉絲可能會失望，但亦可能跟貓頭鷹鍾意認叻的性格有關，其實轉個角度諗，有個咩都識的朋友都唔錯，好似係。