【英雄本色2018】王大陸做Mark哥　最親切都係有林雪

《英雄本色》當年橫掃台灣、日本、韓國，雖然內地冇得上，但當年私下流傳的都不少，之所以早前已有內地片商睇中這套經典，決定重拍一次，成為《英雄本色2018》。以《英雄本色》計，人腳最重要，邊個演Mark哥、豪哥、傑仔都難搞，開拍時，已公布演員，而日前公開的預告片所見，終於可以配對，Mark哥會由王大陸飾演，豪哥是實力派演員王凱，而傑仔就由同樣賣靚仔的馬天宇擔正。至於導演，就由《大兵小將》、《警察故事2013》及《解救吾先生》的丁晟執導，《解》片能拍出的緊湊，未知能否給予大家點點信心？

從首條預告看，明顯故事繼續以兄弟情行義氣為主，至於槍戰爆破場面，只有少量流出，未能作定奪。不過全片最令香港人感親切的是有林雪登場，有睇舊版，仲記唔記得曾江飾演的堅記車房老闆堅叔，一句︰「做生意？坐監就坐監啦！」可見他為人爽正不拘泥，而當豪哥遇襲時，更挺身而出，相當重義氣。而林雪今次就是飾演類似堅叔的角色，跟豪哥有更多情義交流。

其實戲中的王凱都值得留意，雖然舊版《英雄本色》Mark哥的搶眼程度搞到好似佢先係主角咁，事實上故事本身是以狄龍飾演的豪哥為首，而內地版似乎想「撥亂反正」，由王凱飾演豪哥。王凱近年相當吃得開，先在《琅琊榜》有出色表現，然後電影上已拍成中國版的《嫌疑人X的獻身》，擔正做內地版湯川學（唐川），而拍攝中的《真 ‧ 三國無雙》就飾演曹操，相當矚目。