【棟篤特工】黃子華佘詩曼黃金拍檔賀歲 有冇機會打破票房宿命？
講咗好耐，黃子華佘詩曼呢對黃金拍檔合作的新戲《棟篤特工》終於宣布出年同大家賀歲。
雖然子華神的人氣一直高企，無論係賣到600、700蚊的篤棟笑飛，定還是免費收看的電視劇，都大受歡迎，唔係一票難求就收視大爆，唯獨中間着墨，賣70蚊張戲飛的黃子華，就連番失利，票房不濟。今次有埋阿佘幫手，加上海報已率先惡搞007，且看今次可唔可以一雪前恥，承接《國產凌凌漆》後，另一部惡搞《007》的經典。
2008年，子華與阿佘合作的電視劇《絕代商驕》，收視高企，麥提爽同林淼淼兩角更加深入民心。差不多10年後，二人終於在電影《棟篤特工》再聚，戲中子華神飾演特工，阿佘就扮演Madam，角色設定依然係一對鬥氣孖寶。
電影今日率先釋出官方正式海報，設計以占士邦電影為藍本，並選擇了1981年，羅渣摩亞（Roger Moore）主演系列的《鐵金剛勇破海龍幫》（For Your Eyes Only） 的經典設計，一個露半臀的靚女大曬無敵靚腿，而占士邦就在她雙腿之間拔槍。去到《棟篤特工》，概念大同小異，美女換上黑白乳牛圖案比堅尼泳褲，腳踏紅色高跟鞋，看似正正經經，但搞笑在細節，美女大髀位置就紋上「我係佘詩曼」的心型紋身，擺明整蠱阿佘。至於子華，就一身踢死兔禮服配上手槍，非常過癮。問到子華拍攝當日趣事？子華笑說：「估唔到佘詩曼咁都制。」阿佘亦不輸蝕，速回一句：「嗰日子華影poster影得好開心！」看來兩位是要惡搞到底，貫徹始終。
黃子華的電影宿命？
其實子華都好耐冇擔正拍電影，近年都是客串居多，例如在《暗色天堂》飾演法庭公眾席的市民、《金雞SSS》中的十三少，較多戲份是《失戀急讓》中飾演鄭秀文前夫。其實《衝鋒車》的戲份都多，演一名養曱甴的怪人，可惜因審批問題，最終上畫時全線刪走，只能收錄在DVD。至於做主角又拍好多年的《神秘寶藏》，又係上映一推再推，最新消息是原定的11月檔又可能要延期，真係多災多難。至於子華的舊作票房，《情意拳拳》、《嚦咕嚦咕對對碰》都是票房慘淡，就連他自己都在棟篤笑上不時作為自嘲題材，笑言《嚦》片是他最後一部主演的電影。縱使後來被叫好的《男歌女唱》和《一蚊雞保鑣》，上畫時都是淡淡然一片，大家都是後知後覺。未知今次拍阿佘能否打破宿命，但觀乎近年大家恨睇子華的熱情，相信今次可以突圍！
其實《一蚊雞保鑣》首《不灰鞋》都幾好笑！