【加薪跳槽系列三】講數4式　秒殺「腦細」無難度

走進「腦細」房，開口要求加人工，房內空氣即時升溫，面紅耳熱的他或她隨即連珠爆發︰「過去一年公司表現唔太好，真係加唔到咁多俾你！」、「隔離組阿Jan表現好咁多，都無要求加人工！」、「你話我知，你憑咩加咁多？」……

不想一下子被「腦細」技術性擊倒？ 《香港01》向僱員服務顧問孫立民請教加薪講數4式，助你提高勝算。

第一式︰證明自我價值

加薪對話中，打工仔發聲次數，可能只此一次，孫立民表示，為了好好把握機會，麻煩各位打工仔事前做足功課。

「假如打工仔深信自己above the average，更加要了解行情，係underpaid？抑或overpaid？相差多少？如果要證明自我價值，不妨將過去一年表現量化，譬如客戶數目、營業額、賺取利潤等等。最終目標只為證明你是不可取代的！」

第二式︰退讓以兩次為限

說時遲，那時快，老闆似乎有點軟化。

「開過價嚟。」

開太低，實在虧待自己；開太高，又怕「獅子開大口」，如何是好？孫立民認為，打工仔應參考市價，譬如透過薪酬報告、求職網站或其他「收風」渠道了解行業升幅，定下「心水價」。一般情況下，開價應以心水價加減2%作為緩衝就最為合適。

第一回合︰

「假設你的心水價是加10%，開價時就應該叫12%作為緩衝。公司通常會話『考慮吓』，其實背後都係計數。假如公司認定非君不可，一般都不會計較這2%。但假若只加10%的話，打工仔退讓一次，接受也是好的。」

第二回合︰

「但如果公司不認同你，或者你要讓第二次，將加薪幅度降至8%……正常情況下，老闆有決定後會再試水溫開價，如果比心水價減2%更低的話，最好就別接受了。否則老闆往後加幅都只會同步降低，日後難以追回。」

第三式︰戒驕戒燥

走進「波士」房內要求加薪，是無法成為辦公室秘密的。不論勝負，孫立民指打工仔應以平常心對待，切忌「周圍唱」。事關「出得嚟行」，其實個個員工都想上位。那些比別人優勝的地方，最好只有你和你上司知，以及反映在你的薪水上就好了。

第四式︰去得太盡，又何必呢！

人工underpaid得太多，擔心要求加薪無望，打工仔可能會找個「水泡」作為談判的籌碼，好讓自己講數時可以去得更盡。不過，俗語有云，「凡事太盡，緣份勢必早盡」。孫立民最後告誡大家一句︰「山水有相逢。」

「其實今時今日，邊個唔係『騎牛搵馬』？你開得口，老闆都知你有離心，加到就留，加唔到就走。如果老闆一直待你不薄，肯俾機會你發揮的話，就無謂去得太盡。謹記任何情況下，都不要與上司有直接衝突。今日留一線，他朝好相見。」

系列故事接近尾聲，相信思考多日，大概你已決定去或留。不過，決心要走，要在轉工旺季中突圍而出，談何容易？即使見得成工，你又過能否應付到一班「怪獸僱主」？系列最後一章《怪獸僱主出沒！　跳槽須知4件事》將於明天刊登，敬請留意！