【爹哋哥手記】美國LL Bean鴨鞋最強 但二創鴨鞋唔係隻隻熟水性
世界上，有樣嘢叫「似曾相識」。
可能係抄襲，可能係致敬，可能係巧合，可能全部都唔係。
問世間設計為何物？我爹哋哥先旨聲明，唔係玩踢爆，唔好問點解，真真假假只要相信它。
撰文：爹哋哥
近排打風打得密，驟雨多到得人驚，爹哋哥有個大忌——整濕對襪周身唔聚財，所以一知道有風雨，必定進入一級戒備狀態。
鞋櫃入面防水鞋，爹哋哥有好多，不過着來着去都係嗰一對，即係美國百年老字號出品，LL Bean的招牌防水鞋Duck Boots。呢種原先為打獵製作的鞋款，既防水又防滑，所以深得戶外友歡心，經歷過咁多年洗禮，現在當然唔只登山涉水，行商場、睇音樂節都可以Duck Boots上陣，都係貪其夠tough，唔使錫住着，加埋Made In USA的金漆招牌和一世永久保用的信譽（雖然爹哋哥好懷疑有幾多香港人真係會send對鞋去美國整），襟着又襟興的確一流。
以前有唔少人認定Duck Boots難Carry，但多得日本人點醒，配搭Loose Style的Cropped Pants、Denim，出來效果最好，反之一身Slim Style的話，頭輕腳重的效果，相信唔使爹哋哥多講，都估計到有幾災難性。
百年歷史老字號經典設計，一定影響到不少後世設計，不過鴨嘴款式實在太Signature，所以無論點樣變奏，最終出來都係會令人聯想到LL Bean，呢種先稱得上係超越時代的Classic。過去十年來，模倣、疑似的Duck Boots數之不盡，由大眾化「一剔」、日本鞋老牌「月星」、到貴到飛天「V仔」都曾經出過，有Hi-End，又有Sporty，雖然外貌做得神似，但相信當中十居其九都無防水功能，徒具鴨樣，卻無鴨於水上游的本能，咁仲係咪可以叫做Duck Boots呢？爹哋哥深表懷疑。
現今世代，乜都樣行先，功能呢樣嘢，有就係Bonus，冇呢？照買是常識。正所謂「咪住，要唔要，由我自己揀」，買原創定二創Duck Boots自己話事，不過出手前可先重溫一下近代二創「鴨史」。
始終LL Bean先係Duck Boots祖宗，出一款鞋出到大樓前放置巨型Duck Boots模型，仲有埋Duck Boots Car，相信無人會懷疑LL Bean在「鴨」界地位。
爹哋哥 PROFILE
人稱西九龍He-Man。
愛原創的創意，又愛翻版的創意。
唔想成為時尚橋頭堡，只想退休返骷髏頭堡。