【是咁的，法官閣下】律師都算夕陽行業　實際月入低到俾人恥笑？

近日大台劇集《是咁的，法官閣下》主打香港大律師及律師行業真實一面，堪稱香港最真實Legal Drama。雖然「戲劇」面對的現實係，最真實的未必係最好睇，正如美國火爆的《Suits》都被批評唔反映到真實律師行業的日常，但正如英諺「 Don’t argue with success」，（絕大部分）人類的天性係寧願睇到自己想睇的畫面，而非睇到真實畫面。

【做律師好風光？】月薪唔夠20k 多數係孤獨精 道德底線仲要…

Anyway，《是咁的》有劍橋法律系10A港姐麥明詩加持，唔知是否向來敢言的Louisa有份參與編劇，套劇

1) 主打寫實，講新紮律師面對的難題；2) 講好多社會議題，例如學術自由等。

雖然睇睇下，以為自己睇緊ETV教育電視定港台節目，但總算一個新嘗試，其實係高質嘅，如果你夠耐性的話。

咁帶到一個問題，究竟「年輕大律師」收入是否真係套劇講到咁差？例如劇中有年輕大律師，據說收入仲低過侍應，住板間房。

▼▼《是咁的，法官閣下》一劇中話有年輕大律師收入仲低過侍應，要住板間房？？▼▼

早前曾任香港大律師後來轉行的林作接受網站訪問，指稱轉行皆因做大律師是「夕陽行業」。他道出大律師(barrister)行業有僧多粥少情況，大律師數目增長遠超案件增長數目：「看看統計數字……官司數量沒有大升，但入行的新人多到不得了，每年約10%；你入行，但這一行根本沒有生意給你做，這是一件好蠢的事，行業根本做不大！」

【是咁的，法官閣下】律師似藝人？ 前大律師林作：唔紅嘅好兜痞

前大律師說：「我見過做了20幾年、頗為成功的大律師，因某些原因，財政狀況被披露，我見到的反應是……S___！如果我的收入只能去那個程度，恐怕媽媽會恥笑我。」

前大律師此言一出，立即震驚香港七百萬人。呢方面，他似乎是Donald Trump的信眾 ：「No publicity is bad publicity」/ 乜都假，最緊要有Noise！

法律界人士如任建峰亦向該位前大律師發公開信，並反駁指：「先說上述你覺得是低的收入。如果你說那個行家真是做了二十多年而且是「頗成功」的，他或她的每月收入應該都有港元六位數字（很成功那些更會有七位數字）。」

究竟，大律師收入係咪真係咁低？！

有法律界讀者匿名投稿至SJ爆料，做足功課甚至找到前大律師那位「做了20幾年、頗為成功的大律師」的財務狀況真實數字，並表示希望客觀Present出來，然後希望由公眾自行點評。 OK，廢話少講，立即開始：

1. 「做了20幾年、頗為成功的大律師」 是誰？ 前大律師又點知他的財政狀況？

根據2016年一宗離婚案件（判決為公開資料，但因私隱問題所有姓名與敏感資料由法庭隱藏），涉及一位執業20餘年的大律師的男士，以及其前妻。前妻要求贍養費，因此雙方打官司由法庭定奪贍養費多少，而雙方均需披露自己的財政狀況，詳情亦由法庭記載在完全公開的判決書。

估計前大律師係講緊呢一宗案件。

2. 唔好咁多廢話，stats don't lie。呢位做咗20幾年的大律師，其實搵幾多錢？

根據判決書，該大律師雖然執業20餘年，惟並未成為資深大律師，他是一位「Senior Junior」。

判決書直接披露大律師自行申報的過去幾年收入數字：

簡單來講，呢位執業20年的Senior Junior大律師一個月收入有20萬左右（已減去寫字樓 Chambers交租等開支）。

2a. 咁做咗十年八年的大律師收入有幾多？

根據早前一位身兼大律師的建制派議員，在一個訪問中講過「買樓難」呢個話題，佢話自己好多大律師朋友都買唔起樓，雖然他們「有唔錯收入，都有五/六萬一個月，但都買唔起樓。」

雖然呢位議員可信性未能確定，但都係一個Unofficial source。

3. 係咪所有執業20年大律師「先得」 20萬一個月？

在同一份判決書法庭引述男大律師講，話如果自己做到「資深大律師」（Senior Counsel）就有機賺多好多錢，否則應該都係而家呢個數Maxed out咗。他亦指本身想申請做資深大律師，但正因為被前妻做一些壞事而搞「禍」咗。他認為，自己而家提高收入方法，就係成為區域法院法官。法庭指，區域法院法官實際收入（連Allowances）以當時的起薪而言，大概每月22萬。

另一邊廂，說白點，前妻則認為男大律師其實可以搵更多，所以應該要比更多的贍養費。她的估計是：

(a) as junior counsel at HK$5m gross p/a or HK$290,000 net per month；

(b) as senior junior counsel at HK$8.5m gross p/a or HK$390,000 per month net；

(c) as District Judge at HK$210,000 per month；

(d) as High Court Judge at HK$260,000 per month.

題外話 1，江湖傳聞有唔少頂尖資深大律師年賺超過2,000萬。

或者法律界都有呢個20/80 rule：20%的人賺了80%的收入。

題外話 2，據說要升做Senior Counsel （Commercial）的其中一個不成文條件，就係年收入400萬。

題外話 3，其實接Case呢回事，都係一盤生意。無論大律師定律師行業，一樣有人大隱隱於市，悶聲發大財；亦有人敲鑼打鼓做晒大戲，收入都係普普通通。比較可比的行業，可能係攝影師：好多攝影師生計都成問題，但比較出名/懂得留客的攝影師，一日都收幾萬，一年賺幾百萬大有人在。

4. 20萬一個月低唔低？

見仁見智，但正如前妻講，其實他繼續做大律師，努力少少都可以賺到接近40萬一個月。

離婚，難聽的講，通常都一方話自己窮，另一方就話對方其實唔窮仲好疊水。

呢度你咪當要個Average：努力少少的話，該位執業20年的大律師可以提升到月入30萬左右。

月入30萬，咪同投行Director差唔多，點都唔算窮啦。但你要買遊艇的話，當然都未必買得起。

SJ編按：全港最高收入大型屋苑貝沙灣家庭月入中位數16萬左右（2011年）。2017年粗略估計通脹至大約20萬。

所以呢位當時月入20萬的大律師，住係貝沙灣的話，就屬於中間。在非富則貴的鄰居之間，算係「中中地」。 係咪低，就正如讀者所講，真係見仁見智。但咁樣講出口話係S___，又真係得罪人多：原來成香港99%的人連Shit都不如，他們包括你以前的中學大學老師，你以前的大律師師傅，你的同學，你同學的父母等。

香港人：S___，全部都係S___。

5. 點解前大律師講完咁大迴響？

首先，單純以錢銀論英雄，忽視大律師專業的無形價值以及對社會的貢獻。

其次，一個敗走的人咁講，肯定唔Convincing啦，令人覺得酸葡萄。

再者，人工幾低都好，法律界無人逼你讀PCLL入行跟師父做大律師。

最後，君子相分，不出惡言，呢點其實大家有目共睹。

匿名投稿法律界的讀者還表示，點都好，建議大家放過該位仁兄啦。

畢竟，他可能自己都經歷緊Quarter-life crisis，對一切都好迷茫，都唔知自己做緊乜。

SJ結語

其實，做大律師向來並非甚麼「Get rich quick」的行業。

錢固然重要，但人生唔係單純睇錢既。

點都好，祝前大律師早日發達，而該位男大律師則離婚成功啦 -- 兩者均非反話。

更重要的是，有意入行的人及早做足功課，認清事實以及期望，無謂入行後才發現中伏。

呢個對於任何一個行業都係，尤其係好似法律界，Audting等的專業尤甚，因為要讀咁多年書，到頭來先發現中伏，虛耗太多青春與學費了。

大家又覺得月入20-30萬S___唔S___？ 歡迎發表睇法！

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】