【是咁的，法官閣下】律師都收海鮮價？　前大律師林作：記得格價

大律師之收費要視乎每件案件的複雜程度、所需時間、大律師本身之資歷和經驗而定。一般而言，案件愈複雜，大律師的資歷和經驗愈深，收費便愈高。前大律師林作接受《香港01》訪問時就表示：「百萬一堂，一定係民事。至於刑事，最貴一堂都冇可能去到7位數字，我諗半百嘅話都可能去到。民事就一定得，譬如好大嘅商業案，7位數係絕對有。但係民事7位數字嘅堂，唔會密密上。刑事即使收平啲，廿萬一堂都好，刑事案審訊時間長，會多幾堂，圍埋都差唔多價錢。」而根據《社區法網》資料顯示，刑事訴訟與民事訴訟的主要分別，在於前者是以香港特區的名義向任何被指控犯罪的人士提出（即無論受害人是誰，均以香港特區之名義提出檢控），藉以遏止罪案和懲治罪犯；而後者則用以保護產權、追收財產及強制履行訴訟各方之義務（一般由受損失之一方提出指控或索償）。

被問到見過收費最高的案件，林作就稱：「我見過最貴收幾多？梗係自己師傅嗰啲啦，你知我兩個師傅(資深大律師青洪和資深大律師張奧偉)都好勁。但其實最貴嘅意思呢，我一直都認為係對比你付出有幾多。我曾經遇過最貴嘅，感覺係做最少嘢，上庭聽審判，究竟係有罪定冇罪。判冇罪，我哋呢邊就梗係乜都唔洗做啦，但照係上咗堂，所以幾廿萬落袋乜都唔洗做，淨係聽個官講冇罪。（純粹陪個客上庭？）梗係唔係啦，我意思係有時候唔係堂堂都要做嘢，例如證人未到，法官改期或者已經完成咗審判，冇罪就即係走，有罪就要做求情。其實上庭就要收錢，無論要做幾多嘢，所以對我嚟講，最貴就係有一兩堂乜都唔洗做，但照收足價。」

而林作亦提到大律師的價目表絕對不透明：「大律師嘅收費好海鮮，有一啲事務律師，唔老實嗰啲會劏街客。我試過做兩單好類似嘅case，一單係收正價，係上訴，一堂收幾萬，5萬左右。但另一單類似嘅case係開貴4倍左右，最後個客係俾唔起，但佢從來都冇投訴個價太高，所以呢啲嘢都好斬人。」

林作又提醒大家請律師前不仿周圍格價：「大律師價錢可能係專業行業裡面最唔透明嘅，開嘅價都係好神秘，同行之間都唔講得。但冇人阻止你格價，其實事務律師搵大律師之前都會周圍格價。另一個問題，好多價錢唔係一問，對方就俾你，要開個會諗一諗同閱讀文件，所以格價過程需要時間同埋收一啲好低嘅費用，因為你點都要見個律師，嗰度已經係段鐘計，所以都格唔到好多。但我認為，你至少要格兩個，兩個價錢其實已經可以好唔同。如果完全唔格價，其實好危險。」