【職場人際】拒絕上司要有一套！ 10句說話暗擋加班、Team Lunch

小薯被上司拒絕就試得多，但拒絕上司又有哪個有膽量去做？不少上司其實是欺善怕惡，對着態度懶散、隨時準備搞事的老油條敬而遠之，卻把聽聽話話的‘yes man’小薯有恃無恐的用到盡。今天半宅職薯就和大家分享十句拒絕上司的潛台詞，讓一眾小薯在拒絕上司的時候，既能保障自己福利而又不失和氣。

1. 平時已經晚晚OT一小時以上，冇可能再應上司要求每朝早十五分鐘返工。

朝早早十五分鐘返嚟都可以呀，最多我夜晚唔留咁耐，第二朝返嚟先做，咁朝早就一定起到身啦。

半宅職薯解讀：生有限，工作無限，你要我早十五分鐘回到公司，那麼我晚上便不OT那整整一小時，你想我怎麼樣，上司你自己揀！

2. 朝早迫完車返到公司已經好累，冇可能按上司要求九時正上班，九時正便全情投入工作

有時夜晚OT都唔緊要，最緊要第二朝返到公司飲番杯回魂咖啡，再咬啖麵包，咁就乜嘢狀態都返晒嚟啦！

半宅職薯解讀：打工仔平時已經要晚晚OT，第二朝返到公司對着電腦飲杯咖啡，食個麵包當早餐也不是過份要求。其實我飲咖啡，目的也只是為了更有精神應付一天的工作。

3. 一早開會便給我那麼多工作，其實我是吃不消的，可以的話分一部分給其他人做吧。

（開會時一邊拿著筆忙著jot notes，一邊說）唔好意思，咁多嘢我jot都jot唔切，可唔可以講慢少少。

半宅職薯解讀：用「jot都jot唔切」顯示工作實在太多，別說要去做，就連紀錄有什麼要做都已經十分困難，所以還是把部分工作分給其他人做吧。

4. 上司大人，請你不要再在大老細面前當‘yes man’，你一句yes，我們下面的小薯便得忙上好幾天！

唔知大老細係咪諗住幫我哋部門請多啲人呢？我見佢係咁畀job我哋，其實做唔曬㗎喎，到時咪盞連累你（上司）失信於大老細。

半宅職薯解讀：說話的前半段其實只是鋪墊，後半段「到時咪盞連累你失信於大老細」才是key message。

5. 上司大人你打算調我擔任那些高難度的崗位？別打攪我了，我只想安安穩穩每個月等出糧，太重要的工作我是受不了的。

嗰啲搏嘅position，留番畀啲搏上位嘅人做啦。

半宅職薯解讀：開宗明義，我並不打算搏上位，你把這樣高難度的工作留給我，也只是人才錯配。

6. 上司大人，請你不要經常要求全team人陪你一齊食午飯，我連午飯時間都要被你問及公事，其實是十分辛苦的。

久唔久成team人一齊食lunch都ok㗎，大家嘻嘻哈哈都幾好吖。

半宅職薯解讀：成team人一齊陪你（上司）食lunch？久不久一次好啦。還有，lunch時請你不要講公事，午飯時間我只想閒話家常。

7. 我在午飯時間完結之前返回公司，只是想趁還有時間眠一眠休息一下，並不是打算要提早開工的。

食完飯叉一叉電，晏晝做嘢效率高好多！

半宅職薯解讀：磨刀不誤斬柴工，如果我不在午飯時間眠一眠，下午辦事效率會低好多的，所以還是不要打攪我了。

8. 請上司你不要再欺善怕惡，把老油條不想做的工作全部推給我。

做埋阿Sam（老油條）嘅嘢我冇所謂，不過我怕我捱過龍，搞到我變咗好似阿Sam咁，以後慢幾拍咁就唔好囉。

半宅職薯解讀：小薯清楚表示，如果上司再欺善怕惡的話，我也會好像其他老油條一樣「玩嘢」的。

9. 我今晚有事要做，不能夠OT。

阿媽話我今晚再唔返屋企一齊食飯嘅話，以後就唔煮飯畀我食。

半宅職薯解讀：以母親作為脅迫，表示如果今晚不能準時收工的話，會直接影響家庭和諧。相信上司你不會做這種衰人吧！

10. 上司你請不要再在放工前十分鐘才給我新工作了，我不會因此而OT的。

等我寫低先，費事聽朝返嚟唔記得。

半宅職薯解讀：「費事聽朝返嚟唔記得」間接地表示我明天回來才會處理，我今晚有約，我相信你不會厚著面皮叫我留低的。

在這裏我想提醒大家，上司受到小薯拒絕時或多或少會感到失去面子，所以在使用上述招式的時候必須配合謙恭的語氣，在表面上「畀足面」上司，暗地裏卻讓上司明白自己正在拒絕他的要求。

立即下載《香港01》，緊貼公務員職位空缺、勞工處筍工推介，了解CV、面試致勝技巧！
下載網址：
https://hk01.app.link/bkbJyY5t4O