【職場】新人晚晚OT 「old seafood」日日早走 最忌揾老闆出頭
![【職場】新人晚晚OT 「old seafood」日日早走 最忌揾老闆出頭 【職場】新人晚晚OT 「old seafood」日日早走 最忌揾老闆出頭](https://cdn.hk01.com/di/media/images/689663/org/4150f293a825b285fbc132ed8a587361.jpg/gBAI6B6cvBYefRBjMWduncqHr80DQACuGtp1ShradUo?v=w1920r16_9)
撰文:仲欐因
出版:更新:
轉新工本來是件開心事,但不幸遇上「old seafood」(資深同事)大玩「乾坤大挪移」,將工作卸曬畀你便拍拍屁股準時收工,初到貴境的你就真是有冤無路訴。因為上一篇「son」姐張慧敏已經講到,打工仔最忌試圖找老闆出頭,因為死的必然會是自己。既然投訴不得,打工仔可以如何是好?
![明明打同一份工,點解人哋日日準時走,自己就要做到10點?(視覺中國) 明明打同一份工,點解人哋日日準時走,自己就要做到10點?(視覺中國)](https://cdn.hk01.com/di/media/images/689663/org/4150f293a825b285fbc132ed8a587361.jpg/gBAI6B6cvBYefRBjMWduncqHr80DQACuGtp1ShradUo?v=w1920)
除了將工作「外判」,「old seafood」通常年紀較大,往往會以照顧家庭為由未完成工作便準時「松人」。「son姐」教路,見人早走,新人最好別問「點解人得我唔得」。
「舊人有時確會做落舊制度,無褔利對方都不會做咁耐,可能請人時老闆已經知道對方要湊小朋友,畀佢準時走都未定。所以你不應問『點解』,人哋早走亦唔關你事。如你不忿氣硬要比較,老闆可以話『人哋交到咁咁咁成績,你交到咩呀?』,只會比氹自己踩。」
然而,「old seafood」未完成工作離場,令你要花更多時間處理是事實,對事不對人據理反映,就可以點出問題之餘而免做炮灰。「你可以平心靜氣反映:如果A、B、C同事走曬,我要留低處理件事會花多幾多時間,問老闆點樣可以令件事做得更好。如果老闆話做好自己事就可以走,你亦無需覺得唔好意思夾硬留多半個鍾或一個鐘;但如果制度上改變不了,你的工作其實就是要『執屎』,咁你都無謂浪費時間留低。老闆請你返黎為乜,自己多多少少會知。」
「son姐」強調,不公平的處境「幕後黑手」其實是老闆處理不善,因此嬲同事完全是錯重點,亦不應敵視同事,因為出問題的地方是制度。「揸住雞毛當令箭的人大把,但作為新人,幾時都應該先調節心態,放下比較、不忿氣和偏見,任何關係都要透過一齊合作『波來波往』的過程才睇得真,過早對人下定論並不正確。」