坪洲開槍案｜目擊者憶述槍擊案　見追逐聞槍聲即拉閘驚菲漢衝入屋

坪洲警員開槍案，永安街街坊黎女士目擊整個事發經過，初時聽到吵鬧聲，開門見到2個警員與菲漢正在追逐，但都「捉佢（菲漢）唔住」。其中1名警員被叉頸，連開3槍擊中菲漢。黎女士聽到槍聲，惟恐有人搶槍，立刻走入房間躲避，不敢多望。

大年初三「赤口」（24日）晚上10時許，2名警員到坪洲永安街噪音處理投訴案件期間，其中1名警員被菲律賓籍男子「叉頸」追打，繼而跌倒地上，其後連開3槍制服菲漢。

同住永安街的黎女士憶述昨晚事發經過，開初聽到門外吵鬧聲，才得悉有人打架，開門驚見兩個警員與菲漢追逐，惟警員「捉佢（菲漢）唔住」。菲漢向其中一名警員施襲，將警員「打到瞓地」，並用雙手掐著其警員頸部。她又稱警員未能動用胡椒噴霧制服菲漢，「點出到胡椒噴霧啫？打到佢都還唔到手咁滯，條友幾鬼勁」，最終開3槍全部擊中菲漢。黎聽到槍聲後，她女兒即時拉起大閘，「開槍呀，我哋匿埋啦」，再聽到多下槍聲，全部人即刻走入房間躲避，不敢多望，擔心菲漢會搶奪警槍並衝入單位。

黎女士知道中槍菲漢是附近鄰居，居住坪洲多年，「成日都見到，住個邊樓上」，曾在朋友口中得知他住在朋友樓上，經常在單位傳出吵鬧聲，「有人投訴佢都唔肯停」。事件發生後，黎表示自己從來未聽過槍聲，「睇電影先睇到」，對此大為震驚，「 驚呀，驚到訓唔到，成個心係咁跳」，不敢在單位內睡眠，寧願回到她自己家休息。

黎女士指警員開槍不能說是不合理，「如果佢唔開槍佢繼續鍊住佢條頸咪整死佢囉」，又形容當時「佢（警員）捉佢（菲漢）唔住呀嘛，佢反抗呀嘛，（在街道上）走咗兩轉，走得好快㗎捉佢唔緊㗎！好得人驚㗎嗰個人癲到！好大力㗎！狂跑㗎！都大隻㗎！」