【光污染】商場天幕採光過度　居民：眼都擘唔大同雪盲差唔多

香港的商場近年揭起翻新潮，以為居民提供更好的購物體驗，不過，翻新有時候會「好心做壞事」。馬鞍山新港城中心商場月前翻新完成後，出現天幕採光過度的問題，有社區主任直指問題嚴重得令人「擘唔大眼」！

商場天幕的原意是增加自然採光，減少耗電，為環保設計，馬鞍山社區主任鍾禮謙指，天幕的窗框本為藍色，地板上亦非白色，帶有雲石花紋，一直都無過度採光的問題，惟商場翻新過後，情況有所改變。「大約5、6月完成咗翻新，就係香港有十幾日冇落雨，水塘都乾咗嗰輪。」翻新過後，窗框和地板均變成純白色，加上陽光普照，光線經天幕進入商場後，在白色的室內反射，引致強光刺眼的問題。

「住喺附近嘅朋友都話搞唔掂。」天幕位於中庭，為大部分途人都會經過的地方，本身亦是馬鞍山居民的鍾禮謙表示，幾乎日日都會經過該位置，而面對強光，根本「擘唔大眼」，而地板又是白色，避無可避：「誇張啲講句，雪盲都係多光反射入眼，佢同雪盲效果差唔多。」

他又指，除了強光的問題，翻新過後，中庭的溫度亦似乎有所上升。「我哋都留意到翻新之後，中庭都擺咗好多風機。」

就強光問題，他早前聯同沙田區區議員丁仕元去信環保署，要求署方跟進。「環保署覆我哋，話佢哋𠵱家只有處理燈光造成嘅光污染，過度採光冇任何建築物條例或者環保條例監管。」不過，署方仍向商場一方轉達有關意見。

鍾禮謙指，若情況再無改善，可能會直接向商場反映問題。雖然實際上可如何改善，要靠發展商思考，但他認為，只要改一改窗框的顏色、在地板上加上花紋或圖案，可能已可改善問題。