羅致光稱港產假落後非洲　鍾國斌：不知所謂　邊個照顧僱主感受？

政府正研究將法定有薪產假延長至14周，料最快今年底出爐。勞福局局長羅致光今(26日)撰網誌表示，認為可參考新加坡，以一般稅收分擔產假薪酬開支，又指香港比世界其他地方落後，非洲83%國家法定產假都較香港為佳，反問反對派是否以此為傲。
自由黨立法會議員鍾國斌批評局長言論「離地」，以非洲作例比較不切實際，因兩地經濟體系不同，故相關立論不知所謂，他又指，商界反對主因與人手短缺有關，即使是新加坡，亦有輸外勞政策配合，減緩人手荒，惟本港則缺乏支援，且近期勞工議題不絕，商界如同「被打荷包」，再加上近日中美貿易戰「殺到埋身」，經營日趨困難，「又有邊個照顧吓僱主感受呢？」

港府就產假增至14周的研究將於本年底完成，羅致光曾表明會考慮以公帑補貼，今(26日)再撰寫網誌表達立場，解釋由港府「落水」原因，又引述國際勞工組織立論指，倘由個別僱主自行承擔責任，支付有薪產假，將會嚴重影響婦女就業機會。外間有聲音反對延長產假，他則於文末以非洲作例子，指當地83%國家產假都較本港為佳，同時向反對派提出問號，「反對延長法定產假的朋友，真是可以以此為傲？」

鍾國斌：引用非洲例子不切實際

曾公開表態反對延長產假的自由黨黨魁、紡織及製衣界立法會議員鍾國斌，則反擊指，引用非洲例子絕不恰當，兩地經濟體系不盡相同，難以比較，「有咩理由搵非洲去比，人哋失業率都20至30%，大把人手，拎呢啲例子嚟講真係不切實際，佢究竟知唔知自己講乜！」

他又批評局長隱惡揚善，只談其他國家勞工福利的美好，但隱去背後的成本付出不說，「歐洲有啲地方放一年產假，你又唔講？不過人哋抽30%稅，香港得唔得先？」

倘延長法定產假　後果不堪設想

他又指，新加坡政府承擔產假薪酬開支外，同時亦容許輸入外勞，企業得以填補勞動力；反觀香港，未有此做法，同時中小企請人難，面臨人手短缺問題，倘延長法定產假，後果不堪設想，「依家人手都掹掹緊，真係唔夠人，都係叫隔離同事拍硬檔幫手頂埋佢。」

鍾又認為，港府處理勞工議頭「咩都想做」，且變動幅度大，動輒增加數十個百分比，變相向商界「開刀」，「產假要加4成，侍產假又要加6成(由3天增至5天)，樣樣都要加咁多，咩都打商界荷包，好似攞你命咁」，他又指，取消對沖，連同產假、侍產假修訂、勞工假「加假」等倡議等，商界已應接不暇，加上貿易戰「殺到埋身」，銀行加息令貸款難，中小企經營壓力激增「又有邊個照顧吓僱主感受呢？」

職工盟主席吳敏兒：檢討產假姍姍來遲

職工盟主席吳敏兒則認為，鍾國斌所指的本港人手短缺情況，源於勞工待遇條件差所致，「快餐店食飯得嗰廿分鐘、九巴又話要加裝個偵測器防車長瞌眼瞓，有無諗過有工無人做，其實係因為人工低、侍遇唔好？」她又指，本港看似全民就業，背後實情是不少人因收入微薄，身兼數職，「依家住屋咁困難，好多人打一份工都唔夠交租，要住劏房咋。」

她又指，檢討產假姍姍來遲，對上一次已是1981年修例，予婦女獲10周有薪分娩假，惟本港一直低於國際標準，「欠咗打工仔女好耐，今次係還返個公道畀佢哋咋」。