【政府懶理】電視訊號收唔到　馬灣村要自資建轉播站

電視早已成生活不可或缺的一部分，居住的地方要收到電視訊號亦是理所當然。但對馬灣鄉村的居民來說，原來幸福並非必然的。因為馬灣鄉村一直受無法接收訊號的問題困擾，多年來政府沒有出力為他們解決問題，反而要由鄉事委員會出錢出力為當地居民安裝轉播站。

馬灣主要接收由大帽山發射站發出的訊號，惟島上的私人住宅屋苑珀麗灣建成後，遮擋了村屋的接收，令其無法接收到電視訊號。「嗰時仲係模擬制式，發展商亦知道屋苑擋住咗我哋，所以每個月都有畀津貼（鄉委會）。」荃灣區區議員兼馬灣鄉事委員會主席陳崇業指，自電視訊號轉為數碼廣播制式後，雙方達成共識，應由政府處理有關問題，但事與願違。

為解決村民看電視的需要，鄉事委員會於2013年自費10多萬，在馬灣太陽館上裝上臨時轉播及發射設施，惟多年過去，根本問題未得到解決，設施更需鄉委會每月自掏一筆金錢，以作維修、保養。

「我哋要求政府搵塊地，裝返收發站，令居民可以直接收返數碼訊號。」陳崇業連續兩年在區議會上呈交文件，要求政府跟進相關事宜，不過通訊事務及管理局的反應卻不如他預期：「以往政府部門同電視台都有過嚟檢查下訊號強弱，但就只係提供技術支援，之後就冇乜嘢做過啦。」

雖然珀麗灣居民暫未受相關問題困擾，但同區區議員譚凱邦亦指，曾收到居於馬灣村屋的居民投訴，電視訊號接收不良的問題。「南同北面嘅問題特別嚴重。」他續道：「有同過通訊局反映，但佢哋都係逐個個案跟進，而唔係成個馬灣咁跟進，過嚟檢查下唔同位置訊號嘅強弱，調教返啱啲天線，但未可以完全解決問題。」

「佢（轉播站）係郷委會自費，加上佢個接收未必良好，好嘅話我哋都唔會收到投訴。」譚凱邦認為不應將此責任全推予郷委會，希望政府可更換新轉發站的型號，以提高效率：「希望政府可以提供返合理資助同津貼，冇理由要鄉委會承擔所有費用，亦希望電視台可以幫手分擔。」

陳崇業又強調，不止馬灣，不少香港的鄉村都正面對此問題：「而家最唔好嘅係，通訊局話數碼廣播訊號已經覆蓋咗全港99.9%人口，商業上達到目的之後，好似就唔理剩低少部分嘅人。」他指，上次的區議會會議上已通過就問題去信商務及經濟發展局局長邱騰華，希望局方可跟進。