【服務差照加價】上水小巴脫班飛站態度差　 居民嬲到震

不少北區居民都會出大埔那打素醫院覆診，不過上唔上到小巴，就要等運到。有北區居民及區議員投訴，由上水清河邨往大埔那打素醫院的502綠色小巴脫班相當嚴重，而且經常客滿，司機服務態度又差，最近還爭取加價成功，由每程12蚊加到13蚊，令當區居民相當不滿。

「有街坊下午兩點响上水等小巴去那打素醫院覆診，等到兩點九都未有車，最後要搭的士。」北區區議員陳惠達說，502小巴的服務質素一直為人詬病，「呢條線係受歡迎需求大，因為好多北區居民要出那打素覆診。不過好多時上巴在清河邨已上滿客，去到華明邨根本上唔到車。」

陳表示，他曾要求小巴公司增加班次，惟小巴公司回覆請不到司機。「本來加少少大家都接受，不過服務咁差仲加價就好不滿。」

不少居民也在Facebook表示不滿。有居民表示，大埔返上水繁忙時間基本上等不到車。「超級差！亨榮站改站唔上落客又無貼通告，最無腦係原來貼响座位車頭位置、根本唔起眼，司機又唔講，呢種質素仲加價。老人家叫上落車、司機自己聽唔到都鬧返人轉頭！」

除502小巴外，雖然仍有73號巴士由上水到大埔，但若街坊要去那打素醫院覆診，則要在汀角路下車，再走10至15分鐘路才到達醫院。「响汀角路落完車要行條樓梯上去，仲要途經殮房，都咪話唔驚。」陳惠達表示曾向運輸署建議73號巴士可加多一個中途站到那打素醫院門口，惟運輸署以擔心影响小巴502營運為由拒絶。陳惠達表示，現惟有繼續爭取502改善服務，希望能解市民之憂。