【後父之難】難得有緣成父女值得付出：若有天女兒不認我怎麼辦？

阿烈甚至比太太更明瞭小朋友情緒的變化。阿烈和母女認識之初，太太與前夫剛離婚不久，申請搬上公屋，「小朋友面對好多轉變，情緒唔會表現出嚟，但學校成績一落千丈。每隔一段時間就會咁。」媽媽天生性格火爆，見成績差便眼裏冒火把女兒的書包拋出門外，衝口而出：「你唔好喺度瞓，你返去你老豆（親父）度啦。」
「咁我嘅角色就出場喇，就同佢講，你唔應該咁做。」阿烈在女兒眼中，頭頂有耶穌光。慈父，4年來沒有罵過女兒半句。記者直截了當地問：「因為佢唔係你個囡？」烈如是回答：「喺呢個年紀，鬧同打係冇用。」教訓女兒的時候，他卻反問女兒：「如果你係我，你會點做？」阿烈在女兒生命中的角色，是一個挑戰者。「佢大個喇，想畀啲責任佢。」家庭日、旅行的日程，他都讓女兒負責。「佢（囡）細個嘅時候冇爸爸，媽媽又要工作，冇人教佢，所以做嘢好求其，調轉頭現在我要教佢紀律。」

我會做得比親父更好

太太因前夫出軌而離婚，在女兒成長當中，親父的參與僅只負擔些微的補習費。升學、人生目標以至價值觀，卻是這位後父一直拖帶著。去年女兒升中，烈爸爸詳細地與女兒分析各校的優劣。怪獸家長們都預備好厚如辭海的履歷，女兒回家問烈爸：「Daddy點解你冇幫我準備？派唔到咁點算？」烈爸：「Daddy唔會做呢啲。學校係要靠你自己考返嚟。」今次年終升班試，烈對女兒苦口婆心：「今次爸爸唔叫你畀心機，唔想你考試為我哋，今次我想你為自己而戰。」女兒似懂非懂。他自知女兒踏入中學，還是呆頭呆腦，未有人生目標，問她：「你大個想做啲乜？我知道你冇咩諗法，醫生？洗碗？律師？獸醫？」女兒回答：「獸醫。」阿烈：「獸醫要讀幾多書，你知唔知？」

記者問：「對女兒的愛，或多或少出於憐憫？」阿烈搖搖頭，說：「冇。若果我憐憫佢，即是同情。我點會同情我自己個囡。我只想太太知道，我要囡囡比任何小朋友活得好。佢稱得我做爸爸，我認得你係我個囡，承受得起爸爸兩隻字嘅責任，我就要做得到。」

爸爸，我希望永遠長唔大喺你身邊

「我同女兒的親父，分別在於少咗血緣和那八年的時間，但唔代表我做唔到一個出色的爸爸，而且我會比佢親生爸爸做得更加好。」那八年，阿烈無法經歷女兒嘩嘩落地被抱出產房、第一次出牙仔、學走路，「冇計啦，鬼叫你遲咗入場咩。」他卻經歷女兒第一次箍牙，第一次驗眼，他憶述女兒第一次驗眼的時候，明明前景看不清，又故作看見；他手機裏仍保留著女兒第一次在他懷內酣睡的樣子。相識之時適逢女兒生日，他買了一個Hello Kitty的蛋糕，自此每年生日風雨不改，以Hello Kitty蛋糕作為父女相認的紀念。

女兒曾對他說：「爸爸，我希望永遠長唔大喺你身邊。」阿烈甜在心頭。「難得呢個人同你有緣份，係好值得去付出。難得有人肯接受你嘅愛，應該要珍惜。」阿烈與女朋友相識以前，女友曾認識一個男人，與她的女兒見過面，可是女兒對那男人的反應可大了，指著男人罵：「你唔好再揾我媽咪，我唔想再見到你。」所以阿烈深信，後父與繼女都是一段不可多得的緣。有時候，後父卻有他的憂慮：「如果有一日佢講『點解我要聽你講，你又唔係我親生爸爸』咁我點算呢？」太太安慰「啊女，唔會嘅。」阿烈：「但我都畀自己心理準備。」

阿烈口裏常說「我個囡係咁㗎！」由衷地視她為自己所出。他仍記得第一次相識的時候，女兒發著高燒，牢記她每一個表情，甚至精準地說出她的年歲：「嗰時佢11歲半，我同佢去接媽咪放工，佢話好攰，叫我孭佢。」阿烈揹著早已長得高挑的女兒，他問她：「你想爸爸孭到你幾歲？」女兒果然認真地思考，良久，說：「16歲吧！」烈爸爸：「咁咪有排孭？」女兒：「係㗎！」