【後父之難】單親後父恐懼分離　與繼女互解心結：不欲後代感羞恥

阿烈（假名）第2次跟女朋友約會的時候，對方便向他坦言，有一個8歲半的女兒。阿烈承認當時有點口爽：「哦，係啊，冇嘢吖。」第3次約會後，女朋友的女兒自願稱他做爸爸，「心裏面七上八落，要睇住佢大嗰種壓力，你係想像唔到。」他沒有時間準備學做一個父親，突然地多了一個8歲半的女兒。「今日，我好多謝上天賜個寶貝畀我。」
相處多年，女兒說話的語氣都學阿烈。最好笑是到餐廳吃飯，有些女侍應還說：「嘩，你嗰女同你好似樣喎！」阿烈還回：「梗係啦，嗰女我生㗎嘛。」母、女、阿烈三人都心知這不是事實，尷尬的氛圍兩三秒便蒸發，阿烈希望剩下來的是甜，一個後父對繼女的肯定。

單親成長恐懼婚姻　「從沒想過當爸爸」

阿烈，從來沒有當過爸爸。「原本我就冇諗過結婚，甚至生小朋友。」阿烈單親家庭成長，他的大姊中學畢業，為了逃離這個家而結婚，幾年間生了小孩又離婚，「將自己的歷史轉嫁下一代。」他的二姐、妹妹，也逃不開離婚的結局，命運似乎訴說著單親的人不配有美滿的結局。阿烈形容自己看著姐妹跳進坑裏，「唔通我企喺懸崖邊仲會跳落去？」

「不過，當時就覺得既然鍾意一個人，都要嘗試吓先，你吓吓拒絕於人，冇資格同人談戀愛。」阿烈說，「我知自己都可以應付到，但可以唔做梗係唔做啦，係呢種食榴槤的心態去做（父親）。」阿烈要做一個怎樣的父親？「我當佢係一個cute版的太太（現以太太稱呼），點樣錫太太，就點樣錫個囡，起初以陪伴為主，買吓嘢畀佢。我都唔識做，唯有咁㗎咋，頂住檔先。」

當人後父必先解女兒心結

有社工指再婚家庭的小孩會有不安的情緒。而單親，正是阿烈與女兒共通的頻道。阿烈曾聽太太所言，「嗰女見過爸媽鬧交好唔開心。」初為人後父，先必解其心結。「單親嗰種掙扎痛苦，我自己經歷過，我好明白。」那種痛，是不能直視。阿烈從來沒有直問母女與前夫、親父的相處何如，「畢竟對佢哋嚟講，都係唔開心嘅回憶。」他說後父之難，就像看戲遲了進場，故事的開首，女兒過往8年的童年是怎樣，要努力旁敲側擊。「見到一啲情景，問佢（女）有冇嚟過。吓，呢啲地方都冇去過？；同佢玩遊戲，佢話玩過，咁你同邊個玩啊？佢話同爸爸玩過，咁就說笑，咁我玩得好啲，定佢玩得好啲？」久而久之，能夠知道女兒的童年光景。

不欲單親羞恥之感轉嫁下一代

單親的人好像身上裝著一個計時炸彈，情緒隨時被掀起觸動。近來一次阿烈和女兒北上出境過關，女兒著阿烈到那邊排隊，說從前跟生父上來也是那樣。「以前逢五、六、日著住校服，孭住個書包，被老豆拖上大陸，喺麻雀館到打牌打通宵。我就喺隔籬啲凳度瞓，打到天光就拉我走。」「這樣我就知道囡囡唔鍾意被人當波拋嚟拋去。一啲情景好可能會勾起佢唔開心嘅回憶。」

他好記得自己3歲那年，媽媽說到市場買菜，他扯著母親的腳。於是，拖著妹妹站在屋邨前，等著媽媽回來，結果，從下午等待至晚上，隔離鄰舍見狀，叫爸爸接他們回去。母親嗜賭，每逢離家兩三年，惹上一身「蘇州屎」就會回家，每逢回來必會買一大桶「家鄉雞」給幾姐弟，每一次他都以為母親真的回家了，翌日早上母親又消聲匿跡，「所以到現在，我都不會食KFC一桶雞，更加唔會望佢，覺得總會有分離的事發生。」

每逢傍晚時份，阿烈攜著幾個飯盒，走過屋邨那條長長的走廊，家家戶戶傳來炒菜的熱鬧聲，隔鄰的師奶總會問一句：「今晚買咩飯盒啊？」阿烈：「起初覺得冇乜嘢，聽得多覺得好羞恥。」「我唔想呢種感覺轉嫁我下一代身上。之前嘅日子我無法為佢（女兒）彌補，我希望喺佢往後成長嘅日子裏面可以彌補。」