【長安反圍標回顧．三】兩代之爭 法團師奶指「後浪」鍾意玩對抗
2017年，青衣長安邨居民組織「長安後浪」成功撤換帳目混亂的舊法團。部分成員當選法團後，「長安後浪」改組成監察組，監察法團運作，推動法團改革：「更加公開透明，走得比法例更前。」然而，法團被指人事紛爭多，背棄公開透明的承諾。法團為何沒做到長安後浪的「期望」？
今年4月法團換屆選舉後，「長安後浪」向法團發出公開信，建議法團提高透明度。法團委員湯太（關屏仙）憤慨道：「後浪出嗰封信，佢哋有冇問過我哋意見先！我哋都係後浪嘅核心，我哋係始創人。」法團委員和長安後浪之間的分歧，原來要追溯到「長安後浪」的成立。
攝影：顏寧
長安反圍標回顧系列報導：
【長安反圍標回顧．一】戰友反目成仇 新法團被批紛爭多、欠透明
【長安反圍標回顧．二】昔日助選組織「後浪」：新法團都欺壓邨民
【長安反圍標．四】法團風波一路走來 80後業主：要自己關心邨務
被騎劫：我們才是後浪
2016年長安邨法團先大幅增加管理費，後來爆出過「死人授權票」、「天價垃圾桶」事件。現屆法團副主席冼太（周文卿）說，最先由較年長的業主組成「守望長安」，「邨二代」後來才加入；她說，「長安後浪」的名稱由街坊在網上投票選出，「只為方便稱呼」：「後來就變咗好似係佢哋操刀， 真係講得衰啲，佢哋騎劫咗我哋後浪。其實後浪係我哋班師奶成立。」於湯太而言，2017年成功推翻舊法團後，長安後浪已不復存在：「唔知點解仲用後浪嘅名義。騎劫咗我哋，因為我哋係始祖嚟㗎嘛。」
當初大家有共同目標，合作無間推翻舊法團。選舉後，長安後浪在專頁發佈，關注組將轉為獨立監察組織。但是，他們同時協助處理邨務，雙方分歧亦開始逐漸浮現。
「濫插」而不是監察 後浪不理解法團難處
上任之初，法團面對更換管理、保安、清潔等承辦商問題：「初初入嚟，爛攤一個，燙手山芋。我哋真係如履薄冰，樣樣都係由零開始。」他們不熟悉法團運作，後浪的義工也有參與法團內部會議，幫忙處理邨務；這也是冼太所理解的「監察」：「佢哋喺後面做back up（支援）。我哋有做錯嘢、做得唔啱，佢提醒我哋。佢不單止係咁，佢係要佢自己揸主意，有啲質疑就話，我講親你哋都唔聽我啲意見。」湯太形容，他們是「濫插」而不是監察。
她舉例，本來已投票選出管理公司，後浪成員推翻結果，重新投票；招標文件中，沒有採納後浪的意見而被「狂插」。在冼太眼中，後浪似是永遠不信任這群「師奶大叔」能勝任委員，刻意挑毛病：「後浪永遠都係想challenge（挑剔）我哋啲錯位，點解要畀位佢哋『叉』。」
後浪提出建議簡單，但是法團認為未有考慮他們的難處。今年4月換屆選舉前，法團拒絕讓居民參與核實授權票，比舊法團更不堪，被指是「倒退」。秘書曾慶宇說，這是源於前幾次的業主大會監票過程中，居民入內時阻礙點票，造成混亂，法團有感需要重新討論監票安排；同時，委員面對換屆選舉，憂舊勢力捲土重來，未有充足時間準備，最後才決定主席、秘書外，現屆委員、居民都不能內進。他認為，若然只有委員能內進才是倒退，往後能再改善。
人事紛爭阻礙法團工作、導致關係決裂
面對邨務，法團與後浪時有意見不合，內部亦出現人事紛爭。曾慶宇也道：「法團每天都係嘈交嘅階段，實在可以做到嘅嘢好少。」
「可能係推翻舊法團嘅時候，一份熱誠就諗住入嚟做委員，當中有啲唔願意付出時間，同我哋唔合作，拗撬位比較多。」冼太說，當時的司庫以舊法團帳目未清為由拒絕支付賬項，有次令長安邨面對停水停電的危機；而主席亦時常「消失」，甚少在法團的Whatsapp群組回應問題，臨時請假缺席會議是常態。有次，前委員徐偉倫「幫口」時，引來委員間的對罵；期間李嘉林委員提起徐偉倫被舊法團起訴刑事毀壞的案件，被後浪成員指是威脅；他回應，當時為了停止罵戰，隨口說說而已。
外人難以定奪對錯，卻引爆了法團與後浪之間積存的不和。當時，主席連續三次缺席常會，委員引用《建築物管理條例》第344章罷免主席；會議的Facebook直播裡，有後浪成員留言直斥「罷免佢係分明玩針對」：「佢成日都唔出現，咁樣叫玩針對咩？ 居然講句咁嘅說話，我哋聽到真係好火滾。問心講，真係破裂㗎啦，你唔可以喺facebook嘅平台講啲咁嘅說話，分明係同我哋法團玩針對。」
增800萬盈餘 被指欠透明：要求超出「義工」職責
主席被罷免、3名委員辭職，後來有4位新委員加入：「嗰一刻開始真係合作得好愉快，我哋都係自動波。」比起舊法團胡亂花費，購買較市價貴7成的垃圾筒；法團上任一年，最後為長安邨增加800萬盈餘——這亦是他們出選法團的目標：「條邨行返正軌、廉潔，今時今日我哋都係奉行呢樣嘢。」
至於後浪的要求，如讓居民旁聽時查閱文件、委員每星期當值處理居民投訴和意見、將法團文件、工作盡量在網上發布等等，她認為已超出法團的責任：「強調一樣嘢，我哋係義工。盡我所能做到條邨樣樣叫做so far so good（目前還不錯），已經係盡咗自己嘅責任。至於額外嘅嘢，我覺得冇咩必要。」她說，除開會外，委員平日也會巡樓，邨內那裡出問題也立刻親身視察，比往日上班更辛苦，後浪的要求是「得一想二」：「大佬啊，家下我哋打你工咩？我哋有人工咩？」
她說，居民若有投訴，可以聯絡管業處，或寫信並放在法團信箱；目前，法團計劃於平均每月一次的常務會議前一小時，開放會室讓居民表達意見。至於旁聽會議時查閱文件，湯太道：「盤古初開都係冇。」冼太認為，居民入內旁聽拿著議程就足夠，而且法團在Facebook上直播會議，居民大可以隨時重溫：「其實全香港嘅屋苑都無幾多個法團做直播，仲唔夠公平公開公正？」後浪建議，若文件涉及金額，可以先遮掩敏感資料再給予居民查閱，冼太回應：「咁樣好困擾，我哋係咪事必要將10分文件（旁聽名額為10人）又要遮過，做啲咁重複嘅嘢？」她補充，法團委員亦會為長安邨把關：「如果佢哋唔信任我哋，何必要投票俾我哋呢？」
後浪的批評是「酸溜溜」：做好自己就可以
在今年的居民大會上，有後浪成員執著冼太曾說過一次「我食鹽多過你食米」，她承認並回應：「唔通我話食鮑魚多過你食米？」其後被戲稱是「鮑魚卿」，她感覺後浪「無限上綱」。
面對種種批評，她看得淡然，認為不用理會：「啲後生鐘意玩對抗，呢啲唔理佢啦。我哋做返自己嘅嘢，如果我哋唔夠堅強，理念唔夠堅定，退咗落嚟喇。」湯太說，當初做法團委員，也是為了「邨二代」：「我哋個角色就好似阿媽保護緊啲仔。」冼太也豪言：「萬箭穿心都頂得住。」後浪在網上發佈批評法團的言論，在冼太眼中是「酸溜溜」，全因光環不再：「佢哋嘅英雄主義好澎湃。突然間冇咩英雄做，好似有啲失落。」
法團的處事與長安後浪的「期望」出現落差，也許是出於雙方的期望不一，也可能是世代之間互不理解。眼見這些紛爭，小業主又有甚麼反思，日後有何打算？後文再續。
【長安反圍標回顧．一】戰友反目成仇 新法團被批紛爭多、欠透明
【長安反圍標回顧．二】昔日助選組織「後浪」：新法團都欺壓邨民
【長安反圍標．四】法團風波一路走來 80後業主：要自己關心邨務