【單身40年】A0當上婚姻輔導員　常見婚姻問題：女人對老公唔客氣

阿笑（假名，因工作原因不能透露真姓名），她已經是一個頭髮斑白的女人。一個年過半百的A0，曾暗戀，曾被追求，曾被傷害，她的指頭卻未曾牽過一個男人的手。數十年來單身的生活，無法想像。她說自從自己接受一個男人，她就堅定不移地說：「我要一生一世都跟著他。」但這個男人，只能神交，卻不能有肌膚之親，讓她享受魚水之歡。但她說：「我的心，容不下其他人。」這個男人，就是上帝。

【單身40年】糸列報導：

一、【單身40年】喜歡獨自生活不是羞恥：如果單身唔開心，結婚都唔開心

二、【單身40年】曾被男教友傷害欲自殺　28歲列丈夫12條件：要像摩西

病母牽掛：你未結婚

「平時生活有壓力，會想有丈夫嗎？」記者問。「因為上帝真係好似我丈夫。佢為我開路。」她回答。「女仔會享受男女身體的接觸，你有冇？」記者又問。「可能都有嘅，但唔係好強烈。例如性方面，上帝係另一方補足。親情，友情...可能我未試過夫妻之愛，唔了解。但人唔係得一樣嘢。有啲人係夫妻，可能佢哋冇親情朋友，都可能會好痛苦。」

唯一曾有的掙扎，是98年母親臨終時在病床上的遺言。她問母親有什麼牽掛，母親原來就只寄掛她和哥哥未有結婚。「嘩，原來一個病危嘅人，只係掛住呢樣嘢」，她跑出病房痛哭了場，「一直喊，一直喊，我同上帝講好難過，我唔想媽媽帶著一個遺憾離世。」但她總不能為了母親的遺願，馬虎地找一個男人。」

不少婚姻問題出於「閃婚」

未曾戀愛的阿笑，宣教其中一個工作，偏做婚姻輔導員，教會內亦有不少兄弟姊妹請她在婚禮上談婚姻。因此，她見過無數因為趕著脫單，或為應父母之言，或閃婚而悲傷收場的男女。有一對男女來到她的面前做輔導，認識三個月便要結婚，阿笑擘頭便說：「你哋唔會有幸福。你可唔可以比自己一年嘅時間？多啲了解對方。」男的動怒得起來拍枱：「老師，你點解要咁講？我好愛佢，我會畀佢幸福。」不出所料，註冊後一個月，他們便離婚。

輔導教太太哄老公技巧

一個A0如何當上婚姻輔導員，她說只是按著聖經的教導，應用在生活上。聖經上說男人是家中的頭，「唔代表男人比女人強，只是男人要當帶領者的角色。好多婚姻問題，係女人太強，角色調轉咗。」她舉一個例，外出用膳，女人想吃咕嚕肉，不應說：「要點咕嚕肉。」可以換一個語氣，「老公，呢度啲咕嚕肉好出名，唔知你想唔想食呢？」她見過無數婚姻問題，「發覺好多女人對老公好唔客氣」，「啲太太成日會講『你就係咁㗎喇，話極你都係咁。』男人好似小朋友，好容易哄，轉個彎叫佢做晒所有嘢。平時輔導就要教呢啲技巧。」

她認識一對模範夫妻多年，有一天太太竟然向她哭訴，原來丈夫一直在家裏對她不瞅不睬，「到嚟成舊木咁，嬲咗成村人咁。」只在人前故作恩愛，她想離婚。太太向來多言，阿笑著她找機會與丈夫談談，「你兩個坐低，叫丈夫講出不滿意嘅地方，佢講一個鐘，等佢講晒先，千奇唔好駁咀，唔好講嘢。」一談之下，兩人抱頭痛哭，和好如初。先生請阿笑家中作客，感謝她：「好彩我太太有你呢個朋友，我哋婚姻14年，依家先感受到新婚嘅甜蜜，一結婚嘅時候覺得係痛苦，原來結婚係可以咁甜。」

又有一對教會的年輕夫婦，婚後暫住她家中。丈夫每早出門工作，太太無業，每天睡至日上三竿，阿笑觀察他們一星期，看不過眼：「你啱啱結婚，都要做吓樣。老公起身之前，整個早餐陪佢食，送佢出門口，錫佢一啖，等佢做牛做馬都心甘命抵...如果佢出面受到咩冤屈，返到嚟又咁，就好苦。」後來那年輕的丈夫又答謝她。這些有如《真情》電視劇的甜蜜景象，看出阿笑對婚姻的憧憬。她經常提醒被輔導的男女，「你要諗返你當初你對老婆嘅愛。」

外面談什麼「有樓有高潮」，「外面嘅人，要條件嘅結婚，係錯誤的婚姻觀。」因此，才衍生無數婚姻問題，「做呢啲（輔導）都有排做。」