周柏豪哽咽感激太太獨力籌備婚禮：我冇陪佢揀婚紗

周柏豪昨晚（30/4）於紅館舉行《One Step Closer Pakho Live 2017》的尾場，他過去一直好避忌講感情事，但婚後首個演唱會似乎有點釋懷，每一場都提到愛妻，又公開為太太送上《天光》，《我的宣言》和《終於我們》。

柏豪在最初的時間就講到，一定要唱陳詠謙為他作的這3首歌，因為這是紀錄了他和太太的成長和經歷，亦是他們的愛情故事。柏豪先用結他自彈自唱《天光》，再彈住鋼琴唱《我的宣言》。

柏豪感言一直都覺得另一半好偉大：「佢一直喺我背後付出咗好多，其實係上年嘅11月，喺籌備婚禮嘅時候佢為咗唔令我曝光，佢自己做晒所有關於婚禮要籌備嘅嘢，所有好煩瑣嘅嘢佢全部做晒，例如揀婚紗啦，我冇陪到佢揀婚紗，我冇親眼見到佢第一眼着婚紗個樣，揀酒店、Book機票，約親朋戚友全部佢做晒，好似我個人只要去到個婚禮場地出現已經可以。」

他接着又說，其實一直都相安無事，直到婚禮開始前的十分鐘，突然發現有狗仔隊出現在附近，說到此時，柏豪開始哽咽：「佢竟然會問我，使唔使取消個婚禮，嗰一刻我覺得我好難為咗佢，係呢十幾年佢為我付出實在太多，喺呢一刻我知道，係個天俾我一個可以長相廝守嘅伴侶，好多謝佢，我唔知點去用言語多謝佢，但係，我希望大家會繼續祝福我。」說完這番感言，柏豪更一首轉身掩面。