Shine隔16年出《燕尾蝶》延續篇　旋律同官恩娜新歌撞到應

組合Shine近來密密推出新歌，為將於下星期舉行的演唱會造勢。近日推出新歌《不怕》，是繼早前《老花前必做10件事》後，第二首主打作品，由黃偉文填詞、何秉舜及Goro編曲、何秉舜監製，並由徐繼宗作曲。Shine表示：「其實一路都好想做一首《燕尾蝶》嘅延續版，講下自己對呢個城市嘅睇法。事隔十幾年，呢個城市又改變咗，所以我哋好快就將呢首作品完成。」

怎料，歌曲未推出街，就發生一件尷尬事件，簡直就像當年《夕陽之歌》和《千千闕歌》事件的翻版。Shine憶述：「我哋啱啱錄完首歌冇幾耐，有一晚收到監製何秉舜電話，佢話聽到有首歌個旋律同我哋首新歌一模一樣，原來就係官恩娜啱啱推出嘅新歌《寶貝兒》。我哋立刻就追問一下發生咩事，原來係作曲人徐繼宗嗰邊唔小心出咗個意外，就係佢一年前就畀咗首歌官恩娜做，但之後唔記得抽起，到我哋揀Demo嘅時候就發生今次嘅雙胞胎事件。」雖然《不怕》未見街，不過所有事情已蓄勢待發，Shine也表明對今次新歌的喜愛：「其實我哋特登為呢首歌，搵咗一位英國藝術家去設計今次嘅唱片封面，準備喺今次演唱會推出。我哋好希望呢首歌同呢個產品可以推出。」

Shine立即與官恩娜所屬的華納唱片及歌曲原創版權所屬的東亞版權部聯絡，對方亦表示對今次事件不知情，需要進行內部商討。不過雙方也對今次事情抱樂觀態度，華納發言人表示：「雖然鬧雙胞胎不論如何也是尷尬，但我們跟Shine一向關係友好，何況官恩娜有小朋友及Shine開紅館也是喜事。」似乎下星期便會有好消息落實予樂迷。