徐天佑有老婆愛心湯水滋潤　Shine未知幾時拍《紅VAN》續集

組合Shine兩位成員徐天佑和黃又南最近積極為演唱會備戰，日日減肥操肌，佢哋今日出席活動，喺露天地方吹咗成個鐘西北風，唔知係咪練得太勁，身體少咗脂肪護體，兩人雖然大隻咗，就算今日天氣回暖，都凍到騰騰顫，天佑都忍唔住話：「唔知係咪減得太勁，好似真係怕凍咗，（依家脂肪比例幾多?）依家得10%，但一直都落唔到再低啲。」

天佑同又南呢排為咗演唱會進行地獄式訓練，又要操肌又要排舞仲要練歌，依家流感咁勁，唔夠精神真係好易病，不過天佑有愛妻湯水滋潤同補身：「老婆成日都會keep住問我需要咩湯水，例如嗰排乾燥，佢就會煲啲滋潤啲嘅湯水俾我。（拍拖嗰時有無煲開?）無㗎，結咗婚之後開始成日煲，我好開心，終於等到老婆煲湯水俾我飲。」天佑講起老婆嘅湯水，個樣勁冧，係咪真係個個男人都特別憧憬老婆煲湯水俾自己飲呢？天佑因為日日都排練到好夜，練完返到屋企又即瞓，佢話老婆都忍唔住哦佢兩句，不過就算點詐型都好，每晚都叫佢飲完碗湯先准瞓，勁sweet，又南都唔輸蝕，有阿媽湯水飲，兩個都有家人在背後support。

天佑同又南話完咗演唱會之後都要開戲，其中一部仲會一起合作，問到兩人上一部合作的電影《那夜凌晨，我坐上了旺角開往大埔的紅VAN》，已是4年前的事，究竟幾時開拍續集，兩人都話未知，但就好期待有開拍的機會。