黃又南驚現狼人級肌肉　爆肌靠狂操：2個鐘只得30秒唞

《Shine Moments Live 2018》演唱會在即，黃又南、徐天佑最近除了為演唱會練歌排舞之餘，更是秘密地狂操肌，務求在演唱會中見fans時達至完美身形。近日更有又南操肌的照片流出，唔講仲以為係「狼人」Hugh Jackman！

根據官方數據，黃又南胸肌已達37吋，手臂更有14吋，2人為了這次演唱會可謂落足心機。黃又南及徐天佑接受《香港01》訪問時說：「（又南）主要係想體能上。因為5年前，開三面台嘅時候已經氣喘。今次開四面台仲要跳舞，除咗想操個body之外，我最主要都係體能上面再好啲。其實我哋每日排舞都好似做緊gym咁，每日排完舞之後，件衫都可以扭到好多汗水出嚟。」

講起做gym練大隻，黃又南說：「我大約係5個月之前開始做。一星期做四日，一日頂盡都係兩個鐘左右，不過嗰兩個鐘係好地獄式。因為2個鐘入面可能只係得30秒唞（休息）。4組入面，每組之間都係得10秒休息。」不過同為Shine拍檔的徐天佑都唔輸蝕，一樣都為咗演唱會操肌。「其實身形唔係我哋嘅目標，係我哋想睇下可以練到點。我之前就一路做開1日400下sit-up，家在加到600下，教練話之後仲會加到800下一日。冇㗎啦，gym room做唔晒，返到屋企都要做埋佢。」

今次又南天佑操肌可以咁成功，原來背後有「高人」幫助。黃又南：「我有一個玩開『健美』比賽嘅教練朋友幫手。我操嘅時候我哋會互相幫忙。」徐天佑：「前牌張繼聰就介紹咗佢教練俾我，佢係女教練嚟，佢就自己操到好犀利嘅，直頭好似世界健美冠軍個種。」

有健身的朋友都知道，操肌運動量和適當飲食要互相配合。2位在訪問中就透露了自己的飲食餐單。徐天佑說：「我已經keep住食左半年，每日就係蛋白、西蘭花同飯。因為我宜家唔食肉，所以每日就要食30隻蛋白。我宜家都食到哽唔落，試過望住一碗碗蛋白擺晒喺屋企。唉，但係食唔晒個人又會『揑』咗，咁就又『扒』入口。咁就維持左半年，教練話宜家可以多翻啲肌肉，所以就可以食多咗一碗飯。」

黃又南：「因為我初期太瘦，所以就可以乜都食，總之一有時間，就唔可以令自己有肚餓嘅一刻，1日可以食7，8餐。最初我係5-6隻蛋白咁食，早晚計我頂進都係16隻左右。」如果朋友食飯約食火鍋又怎算呢？他們說：「可以嗌清湯，放隻雞蛋同菜落去。」唉，2位今次真的可以稱得上史詩式的地獄式的訓練，為了粉絲們可謂是出盡力。真係好期待演唱會的時候，大隻版Shine上台的一刻。