【專訪】比賽冠軍做Rapper唔怕冇人識　殷穎怡：起碼我有會計學位

一個人為做歌手實驗音樂夢可以去到幾盡？5年前（2013年）就有J Aire（雷深如）放棄做律師，出道成為創作女歌手；2017年年尾卻有樂壇新貴殷穎怡（Judy）放棄成為會計師，從美國回流到香港進軍樂壇成為女rapper。早前乘著Hip Hop熱潮尾水推出Hip Hop歌《超級Fans》，歌曲大有向軟硬天師90年代作品《川保久齡大戰山本耀司》致敬之意。
攝影：梁碧玲
場地：Waalah

「我自小喺美國長大，雖然我無讀音樂，但細細個已經好喜歡唱歌。所以讀完書之後我就膽粗粗與家人分隔兩地，返嚟香港追夢。返到香港之後因為咩人都唔識，要入行唯一嘅渠道就係參加歌唱比賽。」這個就是樂壇新人殷穎怡（Judy）的入行經過。

樂壇新人Judy，她為了成為歌手，離開已移民到美國的家人，放棄會計行的工作，回流追夢。雖然她曾贏得由ViuTV主辦的「FWD熱誠SING級」歌唱比賽冠軍，但要成為歌手，未如她想像中容易：「當時我以為贏咗冠軍就可以成為歌手。但現實與幻想原來唔同。贏咗比賽依然前路茫茫，因為當時咩人都唔識。後來喺機緣巧合之下有位朋友介紹我認識依家嘅經理人，終於如願成為歌手。」

今年踏入25歲的Judy，如願成為歌手。但她的名字可能未有很多人認識，但她依然對音樂有氣有力：「我正式成為歌手嘅時候預咗條路唔易行，我明白會有高高底底。除咗歌手，其他行業都會。所以我唔會怕，我唔會忘記做音樂嘅初心！就算就歌手唔成功，起碼我都完成會計學位，我可以做返會計。」

入行第一主打先以較易入口的情歌《愚蠢》派台，隨著嘻哈熱潮的關係，最近轉以R&B及Hip Hop風格為主，早前推出向軟硬天師的90年代作品《川保久齡大戰山本耀司》致敬的歌曲《超級Fans》，歌曲大談時下的人盲目追求潮牌的風氣，「呢首歌係我公司師姐DJ Bonnie幫我作曲，我自己親自填詞。我本身好鍾意《川保久齡大戰山本耀司》呢首歌，所以我一直都好想創作一首歌曲向佢哋致敬。希望軟硬天師聽到呢首歌都會鍾意。」

聽《超級Fans》之前可以先聽聽軟硬天師的《川保久齡大戰山本耀司》溫溫書。