【專訪】出新歌連自己都唔期待 劉浩龍：以前會聽吓有冇電台DJ播
歌手劉浩龍（師兄）近年主力發展電影工作，儘管密密拍戲，但師兄在樂壇上仍然繼續有新歌推出，但宣傳力度未如從前。最近他推出了新歌《Feel So Right》，歌曲是繼2005年的《Shut Up Baby》後少有的快歌，而且更宣佈將於今年4月底在旺角麥花臣舉行演唱會。不過經歷多年樂壇生涯，師兄卻坦言：「我而家出歌已經冇咁期待。」
攝影：黃國立
場地：The Statium
Stylish：Charles Wong
Jacket：Kent & Curwen
Knitwear：Diesel Black Gold
劉浩龍（師兄）自2016推出EP《Change Your Life》後未有再出碟。雖然他有感在樂壇上慢慢被時代巨輪淘汰，但對於性格不容易放棄的他來說，為了打破這個局面而繼續做好自己歌手本份。「我當年1997年簽華星嘅時候都用咗7年時間先有機會出第一張專輯，我唔係一個咁容易放棄嘅人。」師兄說。
「有好多人以為我依家專注拍戲，其實我年年都有出歌，我根本就冇離開過樂壇。只不過我有啲時間放喺電影上，每次開戲基本上就會有一段時間唔會見其他人，而且有時又會返國內工作，所以除非有電影宣傳或者訪問外，大家會覺得我喺香港好似好少出現。」
由於忙於電影發展，師兄上年只推出一首歌曲《不一定》。在2018年年初推出了快歌《Feel So Right》，提到現在出歌的心態時，師兄坦言：「我依家出歌已經冇咁期待。其實我錄製過程係開心，但到派台當日就變唔再期待。以前嘅我係會派台當日即刻開收音機聽下有冇DJ播，外界對首歌有咩反應。依家心態唔同哂，只要自己過癮過，對得住自己就已經好好。以前出歌真係一派完歌就會喺屋企練歌，因為當年香港成日有騷搵啲歌手唱LIVE，不過依家真係少之有少。我上年出《不一定》嘅時候到依家都未唱過，可能真係要等到4月開騷先第一次唱。」
今年4月27日師兄將在旺角麥花臣舉行演唱會名為《劉浩龍Wilfred Lau Action Speaks Lauder Concert 2018 》演唱會。當中Lauder並非Louder都是演唱會監製刻意設計。今次演唱會海報算是非常特別，造型師特意為師兄從外國訂一把真鬍鬚，並拍攝出一個一點也不「劉浩龍」的劉浩龍出來。
「今次演唱會我冇打算請嘉賓，因為我真係好耐冇見大家（歌迷）。今次張POSTER你會見到我好『打仔格』，因為我好想話畀大家聽我好想同大家拚過。
而且今次呢個騷好多野我都會落手落腳自己搞哂，而且我會想跳舞，因為我跳舞真係好差，所以我今次開騷都想挑戰一下自己。」
他續說：「今次演唱會我盡量唔想改編我嘅歌，我怕改得太多大家會鍾意，我希望可以一入intro大家可以一齊投入識唱一齊唱。」
提到新歌《Feel So Right》是師兄繼2005年的《Shut Up Baby》後的快歌，歌曲充滿飲酒開派對的感覺，「呢首歌我特登搵梁柏堅幫我填詞，其實大家一直都想合作，不過我之前多數出情歌，而我又覺得搵得佢緊係想玩味重啲，所以今次《Feel So Right》終於可以同佢合作。我仲記得當時搵佢約咗佢打邊爐，我同佢講想寫一首歌開正佢嘅喜好講飲酒時嘅快樂。點知佢用咗一晚時間就交咗第一份詞。但係我一睇就覺得佢好似帶咗我去『劈場』飲酒，我就同佢講我想happy唔一定要『劈』，唔想鼓吹大家飲酒。最後我約佢去作曲人Kenix Cheang屋企飲住威士忌寫好份詞。」