【專訪】拍劇上位唱歌要靠自己　胡鴻鈞自嘲：唱得開心足夠㗎喇

在香港當藝人兼顧歌、影、視是常識吧！假若你是一位歌手，但外界的聲音只集中你的外貌，只討論你劇集的角色，你又會如何面對？劇集《降魔的》令胡鴻鈞人氣急升，「石敢當」、「本尊」、「精靈」等等都成為他的代名詞；劇集爆紅前，大家只留意他的容貌，網民更mean爆稱他是「刀削面」。胡鴻鈞歌手的身份彷彿被這些聲音淹沒，但他卻豁達說：「入得呢行食得鹹魚抵得渴，如果可以帶歡樂俾人嘅話，何樂而不為呢？」

歌手身份被淹沒？

當藝人自然想有人談論，但外界聲音總是批評，或者與音樂毫無關係，身為歌手的胡鴻鈞如何調節自己的心態？他表示：「開頭的確會唔適應，覺得我明明係唱歌嘅，點解要俾人評頭品足呢？但慢慢就會接受，食得鹹魚抵得渴，要學識擁抱呢啲負面嘅聲音。同埋有前輩分享過『做呢行最緊要心臟夠強大』！」

的確，再次面對「刀削面」的聲音時，胡鴻鈞能自若地面對，更試過自嘲是「7.0」，他表示：「講真呢樣嘢對自己冇乜傷害，最重要知道自己做緊乜。喺娛樂圈都係一個entertainer，可以帶到歡樂俾人嘅話，何樂而不為呢？再講，有人評論好過冇人評論，最後觀眾都透過唔同途徑會認識到我嘅音樂，咁已經好足夠。」

赤裸地與大家分享陰暗面

胡鴻鈞早前推出新專輯《到此一遊》，與《降魔的》主題曲同名，令人聯想到為承接劇集的勢頭而推出，但他卻表示這張專輯主題是探討自己的內心，並希望聽眾藉此更認識自己。

胡鴻鈞將過往的感情經歷，及陰暗面寫在《情人自擾》之中：「首歌好赤裸咁將自己嘅dark side同大家分享，以前因為自卑、妒忌破壞咗一段關係，當時仲要淨係識得責怪對方，未識反省。到最近心態改變，有勇氣踏出一步完成呢首作品，面對自身嘅問題，發現原來都帶俾聽眾啟發，我覺得咁樣係做緊一件啱嘅事。」

胡鴻鈞覺得面對外界聲音，一切都取決於心態。(黃國立攝)

胡鴻鈞都覺得《到此一遊》似《夜曲》？

除了《情人自擾》之外，胡鴻鈞私心推介《今天之後》：「純粹係因為自己寫，有情義結，哈哈！不過當然都係講自己嘅感情經歷，以前自己付出唔夠，到對方離開先識後悔，但係已經追唔番。」

雖然胡鴻鈞希望聽眾更了解自己的內心世界，但網民的着眼點都放《到此一遊》一曲上，因為與周杰倫《夜曲》感覺很相似，咁佢又點睇呢？胡鴻鈞大方說：「我聽番嘅時候好老實講係有啲相似嘅，相似嘅地方係個結構，但旋律同莓其他方面就唔似嘅，可能係帶出嘅感覺氛圍相似。(咁會唔會唔開心？) 唔會呀！好感恩大家會將呢首歌同《夜曲》去比較，都係一種榮幸嚟嘅，哈哈！」

原來胡鴻鈞冇學過唱歌！？

相信大家聽過胡鴻鈞的作品後，都知道佢個range都偏高音，如果男讀者想同樣輕柔地處理《遙不可及》、《朋友身份》都會幾吃力，到底有啲咩Tips呢？胡鴻鈞搞笑話：「Tips嚟講呢……唔需要care個音準嘅！只要自己爽，唱得開心足夠㗎喇！我成日覺得唱歌應該當係娛樂，唔需要太大壓力，用你嘅方式，放聲嗌都OK！」

當然啦，做歌手要學識保護自己聲線，鍛鍊各種技巧除咗令自己演繹更自如，更重要的是避免損耗自己嘅聲帶。但原來胡鴻鈞由勝出比賽至今，到出唱片一直都是無師自通，他謙虛說：「死喇！去到呢啲位就冇乜墨水㖭……其實我都係半途出家，之前一直都係靠自己練。依家真係要敬業啲，要開始學唱歌，因為講咗好耐都未正式跟過老師學唱歌。」

雖然胡鴻鈞沒有學過唱歌，但在《超級巨聲》時已贏得外界好評，獲讚水準夠穩定，但他希望自已可以不斷進步：「既然身為歌手就要好認真對待自己事業，歌手緊係要唱好歌㗎啦！要搵方法令自己不斷進步！同埋新一年目標有更多創作，能夠直接表達自己想講嘅嘢，呢個亦係大勢所趨。」