【叱咤】攞完女歌手金獎就要忙演唱會　衛蘭：準備過程得50%咋！

一年一度樂壇盛事──《2017年度叱咤樂壇流行榜頒獎典禮》昨晚圓滿結束，無論是獎項結果，還是當中的表演環節同樣令人感動，因為叱咤賽果不再像以往一樣壟斷，一眾後起之秀，值得被重視的音樂單位終於得到主流平台的肯定。

叱咤女歌手金獎的殊榮終於落在衛蘭身上，難怪昨晚在台上感觸說：「我等咗12年喇！」的確，能夠打破容祖兒冧莊連勝，為樂壇帶來新氣象，實在得來不易，相信樂迷們都替Janice高興。

衛蘭有一把靚聲，今年音樂風格有所突破，亦有《I Don't Know, I Don't Care》這種揉合Jazz風格的作品，向大家展示了流行曲多變的可能性；可是，外界往往談論她的外表、身形，被揶揄「肥過部電單車」，這些「Juicy」的聲音淹沒了她的音樂。

衛蘭在叱咤慶功宴接受訪問時，被問到今次得到叱咤女歌手金獎，是否終於打破外界的批擊，同時證明只要專心做好音樂，總有一日會得大家的肯定？衛蘭表示：「係呀！希望可以鼓勵其他人，好似陳詠謙《脂肪葡萄》嘅歌詞所講，『我叻仔我可以肥』，『我叻女我可以肥』！哈哈！」

另外問到，面對負面評價時，甚麼人是她最大的動力，一直堅持下去？衛蘭坦言要感激一班樂迷：「其實講真係我啲fans呀！當我做得唔好，或者想放棄嘅時候，佢哋成日會打一啲text message俾我，去鼓勵我。同埋聽到一啲人話『聽完你唱嘅歌感動到我，幫到我好多』呢啲說話，俾到我好大動力去繼續做我要做嘅音樂！」

最後問到，今次得獎是否為今個月《Oh My Janice》演唱會注入強心針？衛蘭透露原來綵排進度非常緊迫：「唔知呀，我冇諗過呢樣嘢呀，都係盡力做好自己嘅歌！講真喺演唱會嘅準備過程都係50%咋！（咁時間咪好緊迫？）係呀！好tight呀！我希望有個神迹！」雖然演唱會排練時間緊迫，但Janice都向樂迷承諾到正式on show那天一定會100%發揮水準，將最好的一面呈現給觀眾。