【叱咤】李克勤首奪「叱咤男金」　用奇連伊士活比喻自己

今晚《2017年度叱咤樂壇流行榜頒獎典禮》進入最緊張時刻，大獎一個接一個。頒發「叱咤樂壇男歌手」金獎，李克勤終於如願以償，得到出道三十年以來的首個「叱咤男金」。雖然2003年得過「叱咤樂壇我最喜愛的男歌手」，不過與「男歌手金獎」在意義上又有不同。

克勤上台講得獎感言時，他以《奧斯卡金像獎》來比喻《叱咤》：「有一啲歌手年年都有提名，隔年就有得攞獎，就好似梅麗史翠普咁。當然我唔係呢啲歌手啦，我就好似里安納度狄卡比奧咁，提名好多年，每次都擦身而過，終於可以攞到一次，大家都為佢鼓掌。不過我唔係傻嘅，我梗係唔係里安納度啦，我有自知之明，我係咩呢？我應該係奇連伊士活，大家其實唔係好記得佢有冇攞過，不過如果呢個年紀攞到，大家值得俾啲掌聲。」他亦在台上多謝譚校長：「要多謝我舊嘅經理人公司唱片公司，因為我覺得呢個獎係有累積分。我更加衷心多謝譚詠麟先生，我諗你會為我高興。」他亦在台上笑言：「多謝英皇，俾咗一個有上限嘅無限創作空間我，每一位都對我呢個新人咁好。我亦要多謝我嘅歌迷，有啲女仔跟咗我好多年，跟我仲耐過跟佢老公。不過唔洗擔心，老公唔會呷醋，我唔會愛你，不過我會好珍惜你哋比我嘅愛。」

首奪「叱咤男金」，他謂：「我手上拎住呢個叱咤903嘅獎項，李克勤自問喺攞呢個獎項之前、而家，甚至之後，都無咁嘅能力或者資格。李克勤只係想做一個大家身邊嘅好朋友，為大家提供一啲娛樂。好多人話叱咤嘅獎好難攞，但我想講如果李克勤都得，大家都應該Keep住呢份希望。」