E-kids找數送iPhone　fans錫錫10秒攞到獎玩咁大？

有「MK Pop始祖」之稱的組合E-kids上月推出新歌《一二三四》，歌曲節拍強勁但歌詞唔啱音而且MV拍到天旋地轉，觀眾小啲忍耐力都好難一次睇晒，不過當時Tommy接受訪問時表示：「睇得晒當你贏！因為我哋3個成14年冇一齊拍MV，想挑戰觀眾聽歌嘅底線，而且有『官能刺激』。」事隔14年E-kids三子再聚頭出新歌重新出發，為咗隆重其事仲舉辦「睇MV送iPhone」活動，當時仲實牙實齒話會找數，話咁快就嚟到「找數日」喇！

日前E-kids facebook專頁貼出禮物相，寫道：「講過就係～恭喜晒所有得獎者」，不過成員阿Tim就冇現身，換咗另一位「阿添」客串，所以「送出濕吻30秒」今日就唔成事，真係戥得獎者「可惜」喇。Tommy問到三位得獎者創作咩對聯先贏到獎品，估唔到答案分別係「一二三四，充滿驚喜」、「一二三四，一飛衝天」同「一二三四，型爆到死」，Tommy同Alan聽到答案都忍唔住話：「嘩！咁流㗎！咁就有呀？有冇搞錯呀！」

話雖如此，重點當然係放喺送大禮上面，Tommy就話今次係「送舊迎新送iPhone」。Tommy同Alan又點會咁易放過啲fans呢，兩位中咗iPhone7 plus嘅朋友要錫錫10秒先可以攞到iPhone，令到氣氛即時變得好刺激，兩位女fans神情尷尬，擾攘咗一段時間先肯錫錫。

不過最後喺Tommy同Alan軟硬兼施之下終於氹到兩位錫錫，本身講到明hold住10秒，最後都要分開3次錫。明白嘅，鏡頭面前錫錫係會怕醜嘅。Tommy同Alan又宣佈繼《一二三四》之後會出第二首歌，叫大家「咪諗」，唔知係咩玩法呢？又講笑話2月個騷叫做「Spider Man」，食字玩「失敗的Man」演唱會。

大家如果覺得自己冇份攞iPhone有啲嬲豬，唔緊要，睇番個MV開心下。