E-Kids旺角封路拍MV 手續煩搞足2個月：想直接同班大媽死過
昨日三十幾度氣溫下，旺角街頭仍然有人身穿長袖衫勁歌熱舞，難道旺角街頭不止是大媽的舞台，連非洲朋友也來湊熱鬧？望真一點，原來是人稱「MK Pop始祖」的E-Kids三位成員在豉油街為新歌《一二三四》拍MV。
完成拍攝工作後，E-Kids三子接受訪問時仍然不捨得脫下身上的長袖衫，問到他們為何這樣堅持，成員Tommy打趣表示：「唔除啦！其實我哋除咗「衫」好多年，份份糧都要除三，亦有人同我哋講要除三害，就係我哋呢三害，既然除咗咁多年，我哋決定今晚一定要著多啲。」
提起今次在旺角豉油街封路拍MV，三子紛紛表示過程繁複：「我哋同路政處搞咗兩個幾月。我哋最初要求在旺角封街，星期日，行人專用區，基本上我哋係希望直接同啲大媽死過。你哋都知啲大媽啦，梗係唔守規矩嘛，其實我都想同佢哋講，大媽你哋都喺度唱咗咁耐，攰啦，返去訓啦！俾幾個鐘頭我哋呢啲後生仔出嚟跳吓得唔得呀？」當然要封行人專用區也不是這樣容易的事，導演組便向他們提議：「不如我們正式向路政處申請，最後用兩個多月時間才申請到今天拍攝，可說是風雨不能改。」
三子繼續補充：「其實早幾日不停打風落雨，我哋都好擔心，昨日起床仍然是滂沱大雨，我一起身就忍唔住爆咗兩個字出嚟。好彩今日天公造美，如果今日都落雨嘅話，我哋首歌就唔叫《一二三四》，就要改名做《瀨X晒嘢》。如果真係繼續落雨，就濕住都要繼續拍。」原來MV正式落實拍攝前，公司曾與他們商量地點問題：「因為外界經常話我哋係MK Pop，公司就同我哋講『不如洗洗底啦，飛去其他地方拍啦。』我哋就覺得，香港人嘅觀念，唔係你話洗就洗到，所以我哋決定去盡啲，一係唔拍，一拍就封咗條街嚟拍。都真係要多謝公司，用咗六位數字去製作，希望大家睇到我哋嘅誠意。」
三子曾於去年演唱會上表示很珍惜「無得瞓」的時光，今次也不例外：「你都知我哋呢三五七年無嘢做，成日都瞓教，養到自己的身體大大隻，所以最近除了做歌、宣傳、拍MV外，更要操Fit身型，真的很珍惜這些『無得瞓』的時間，八月我哋仲有一個MV會去日本拍。我哋三個加埋都有番咁上下年紀，仲有呢個心去做好一件事情，其實真的很開心。」
說著說著，他們更鼓勵一眾考完DSE的學生：「大家都知我哋三個人會考加埋唔夠五分，但到而家都仲比我哋生存到。所以咁多位DSE嘅考生唔洗擔心，成績唔一定代表人生嘅一切。」三人看似無厘頭，但卻有著樂天的大智慧。