【有片】E-Kids出新MK神曲《一二三四》　Tommy：聽到唱咩當你贏

日前公開考試放榜，被喻為「MK pop始祖」的E-Kids再度出現為考生打氣，雖然三子冇乜「成績」，不過努力多年，終於可以重返樂壇。今年三子「封盤」又「封街」，繼Alan都宣佈即將結婚後，E-kids又準備出新歌《一二三四》，在豉油街封街拍攝跳舞片段，都幾認真。E-Kids坦言：「你哋都知啲大媽啦，梗係唔守規矩嘛，其實我都想同佢哋講，大媽你哋都喺度唱咗咁耐，攰啦，返去訓啦！俾幾個鐘頭我哋呢啲後生仔出嚟跳吓得唔得呀？」

《一二三四》其實玩味非常重，因為以EDM加上廣東話歌詞，其實都幾奇怪。唔少人可能覺得電音會很mk，但結果被稱為「mk始祖」的E-kids就出電音歌，Tommy笑言：「你可以話係食住MK，成首歌都係MK之歌，我地其實係EDM，呢種音樂一直都好想嘗試，都係向死亡挑戰﹑向難度挑戰的一首作品，因為呢種歌唔係好適合放廣東話，我們仲要RAP得咁密！」

呢首歌聽落其實唔會知他們唱什麼，甚至...要用米奇老鼠音來唱，但Tommy就話：「唔啱音都唔緊要，照RAP出黎，聽到我哋唱咩當你贏！」

E-Kids今年又出返歌，你覺得夠唔夠mk呢？

今次新歌背後，原來有多年的老友DJ少爺占為他們填詞。「當年第一隻碟主打歌《初哥》和演唱會歌曲《第一個唱》都係少爺占填，有個情義結，今次重組都搵返當年合作的填詞人合作，所以一想就諗起佢做！」

Tommy又補充：「讚又好彈又好插又好，都係想大家多些關注，我們放了好多心機，做呢首歌到錄音，用了半年時間，錄音都用了廿幾三十個鐘，我們冇辦法好有型話唔聽唔緊要，真係希望大家聽到！」

E-Kids的《初哥》就係少爺占填詞，一句「嘻嘻，我諗我鍾意咗你丫」，真係好深刻。