布志綸Solo出新歌　被批「飛起隊Band」好無奈：對成員好唔公平

樂隊Mr.之前經歷被指抄歌，多次傳出解散的消息，又與前唱片公司出現糾紛要「還歌債」等等問題，大家的視線都放到Mr.各人的花邊新聞上，忽略了他們的音樂作品。種種問題令Mr.各成員感到氣餒，雖然樂隊沒有解散，但現時五子「各有各忙」，鼓手Tom經營自己的樂器店，結他手Ronny及MJ開班教結他及參與不同幕前演出，Bass手Dash參與幕後工作；相信不少樂迷都希望見到Mr.五子再踏台板齊人開騷。

雖然不常聚頭，但Mr.五子仍然堅持做音樂，早前主音Alan參加ViuTV《ShowTime我主場》與樂隊Hey Joe Trio合作演出，讓觀眾再次留意到他的聲線。到近日Alan推出個人單曲《人在野》，歌曲抒情訴說着Alan自己的故事，而且邀得歐陽妙芝及吳海昕擔任MV女主角，畫面充滿溫情讓人感覺到有希望，而且歌詞亦值得大家細味。

《人在野》一曲訴說着Alan的故事，Alan表受《香港01》訪問時表示：「今次《人在野》呢首歌係想講，人生嘅路唔係每一段都平坦輕鬆，有時候就好似走入咗個森林，未知前路方向。歌詞係講緊我嘅呢兩、三年嘅故事，雖然有遇到挫折嘅時候，但其實身邊仲有人支持自己，仲有人明白自己，件事係有希望嘅。《人在野》呢首歌想送俾我太太，送俾明白布志綸嘅朋友。」

《人在野》曲歌風格與以往樂迷認識的布志綸有所不同，編曲加入弦樂，聲線變得溫柔，讓樂迷認識另一面的布志綸，他表示：「人其實有好多面，今次係我放咗好多心機去做嘅一首歌，亦希望透過隻歌去證明我自己做音樂嘅態度，我唔想夾硬去做一件『商品』出嚟，係態度行先。」

身為Mr.主音，外界經常將Alan與Mr.劃上等號，令他備受壓力，有新發展就被指「飛起隊band」，對於外界種種聲音Alan亦慨嘆：「點解每次矛頭都指向我？一路以嚟好多人誤解我，其實Mr.係五個人㗎，我只係Mr.其中之一。如果淨係話我就等於Mr.，對佢哋好唔公平，佢哋都會唔gur㗎！其實每個人都會有自己嘅想法，亦都用緊自己嘅方法去嘗試。」