【專訪】監製兼任幕前演出為乜？　AlexFung：咁樣撞出嚟會有火花

Alex Fung馮翰銘這個名字相信大家會聽過，與不同天王天后合作過，甚至在不同頒獎禮上都聽到歌手們說：「多謝Alex Fung！」畢業於Berklee College of Music的Alex Fung實力不容置疑，除此之外還有甚麼因素令Alex Fung成為天王天后心目中的信心保證呢？
攝影：梁碧玲

早前Alex Fung與Kary吳雨霏合作推出歌曲《Come With Me》，歌曲是比較Groovy的EDM(Electronic Dance Music)，相對「易入口」而非大家刻板印象中的「夜場歌」。到底這次合作如何促成？

Alex Fung笑言與Kary「臭味相投」：「其實我識咗Kary好耐，大家都『臭味相投』好耐，想做一啲唔一樣嘅音樂，想將我哋鍾意嘅音樂帶俾大家聽。我近一、兩年好迷一啲好有旋律性嘅EDM。例如……某一啲嘅ChainSmokers係OK嘅，唔好Judge呀！哈哈！」

Alex Fung又講到：「其實兩年前我哋已經開始咗第一隻歌，類似FKA twigs一啲再癲啲、怪啲嘅電子嘢，但係Kary話自己兩年冇出歌，想出一隻自己又『Un』到，大家又聽得明白嘅歌，跟住就有大家聽到嘅《Come With Me》。」Alex Fung又形容今次製作班底是「international合作」，他所佔的作曲部份不多，編曲請到本地音樂人Kiri T.，而且請到來自L.A.及芬蘭的音樂人一同合作，為樂迷帶來香港不常聽到的聲音。

在《Come With Me》中，Alex Fung作featuring加入自己的人聲唱埋一份，而且以往亦曾作不同的幕前的演出，例如與容祖兒合作開騷，是否希望如Pharrell Williams、Neil Rogers幕前演出與監製並行？

Alex Fung謙虛說：「千祈唔好！同佢哋相比只有被插嘅下場㗎啫！其實冇諗咁多，只係寫呢首歌嘅時候有一把男聲，而且覺得同Kary把聲幾夾所以試下。其實Producer會feature全世界都好common，例如：Dr. Dre會feature Eminem。」

Alex Fung又講到：「其實咁樣好好玩，今次係Kary同我嘅小小結晶品，而唔淨係幫一個歌手做歌，唔需要淨係迎合一個歌手，做一套淨係啱佢着嘅衫。咁樣撞出嚟會有火花，亦係大家追求緊嘅新鮮感。」Alex Fung講到監製落手落腳「玩埋一份」是好事，大家會「踢自己多一腳」，因為自己背負着一個標籤，希望大家看到Alex Fung這個名字會想起「用心做音樂，並且將不同音樂類型介紹給大家」。

身為監製，又曾與不同有份量的歌手合作，Alex Fung會否有一些「怪癖」或者遇過甚麼趣事？Alex Fung笑言自己是一個喜歡歌手走音的監製，因為這是「人聲」這樣樂器的可貴之處，而且是感受到情緒的自然流露。

Alex Fung表示：「每一個歌手都會介意自己走音，但係我係好鍾意Artist走音走得好聽嘅！好似Ivana王菀之，佢係走音走得好好聽嘅，但佢會好介意覺得『大佬我擺落隻碟到成世㗎喎』；克勤又會話『幫我tune下佢啦』，但係我覺得唔tune係冇咁『CD勤』嘅！都明嘅，哈哈！」

雖然有時要在這些細節爭持不下，甚至會「火滾」，不過Alex Fung笑言自己又也妥協：「有時我mix咗十幾個鐘，到交俾唱片公司嗰陣，佢哋話要改嗰陣真係會火滾，不過好似王菀之有Perfect Pitch(絕對音準)，佢聽到自己走音會起晒雞皮，咁嗰啲我就會妥協，哈哈！」

『堅持唔Tune』未必每位歌手都接受到，但Alex Fung堅持是有原因的：「我好鍾意Live Performance，現場音樂係正嘅！而Live係永遠冇可能Perfect，但係永遠都有走音得極好聽嘅人，好似Coldplay嘅Chris Martin、Radiohead的Thom Yorke，佢哋係冇一粒音唔走咁滯，但係真係好好聽！點解我哋仲要唱歌？就係因為嗰種人性係冇一種樂器可以替代，其實用電腦tune番啱音係好簡單嘅事。走音就係『人聲』呢樣樂器嘅精髓之一！係最用錢買唔到！」Alex Fung亦表示感恩歌手們的信任，而且曾合作過的歌手好像「合作了半世」一樣，所以大家互相非常了解。

由2001年入行至今，Alex Fung對Canto-Pop也有一些感慨：「你使唔使交租吖？我要交好多租呀！同埋香港真係地方太細，太少空間，有啲live house都俾人冚，想搵個自由啲嘅場去唱自己嘢都唔容易。所以希望各路英雄俾下面，俾多啲空間我哋去做好嘅音樂！」

Alex Fung又談到很多網民認為廣東歌「冇嘢好聽」，轉而聽K-Pop，他對這現象有感而發：「有時我好好奇，網民鬧Canto-Pop冇嘢好聽，其實K-Pop都係將Pop加啲Trap加啲EDM再用韓文唱出嚟，但係佢哋真係好團結，政府又投放好多資源，支持流行音樂產業，所以令你覺得K-Pop係一種Style。所以我鄭重呼籲，希望大家啲支持番本地嘅音樂，我哋好需要大家支持，好想大家一齊聽，令更多好嘅本地創作出嚟。而且廣東話、廣東歌，中文唔係你考DSE先至去讀嘅嘢，而應該係一種你鍾意，你會Follow嘅一樣嘢，咁樣流行文化先可以承傳。」

Alex Fung Credits：
Make up：Elaw Wong@thelook-studio.com
Hair：Niki Lee@Headquarters salon