【專訪】吳雨霏婚後回歸樂壇　感激老公遷就：與幕前人結婚不容易

「以前我做嘢會好多planning，由年頭plan到年尾，有目標就要達到。」
「30歲後發現，人生好多嘢重要過搵錢，休息時做多咗義工，令我多咗滿足感。」
吳雨霏(Kary)休息2年後回歸樂壇，心態完全唔同，到底係年紀大咗的體會，還是婚後女人的心態會改變？
攝影：梁碧玲

唔少樂迷都看著吳雨霏成長，02年以組合Cookies成員身份出道，當時只有16歲；04年擔任樂隊Ping Pong主音，後來再以個人身份發展，由06年開始，一年一專輯從不間斷，直至15年宣布與Brian結婚，推出了歌曲《最幸福的眼淚》，才稍作休息，闊別樂壇2年，她承認：「以前做音樂點都會計算，好大壓力。現在的我，年紀大咗心態不同了，最緊要自己鍾意行先，今年有咩plan？我冇特別planning，真的沒有實在的想法，現在的自己才是最舒服！」

由「不習慣」到「舒服」，大概是一個過程，被傳媒冠上「人妻」的稱號，初初當然不習慣。「開頭覺得太多喇，依家都覺得是但啦，我覺得都冇乜所謂，呢個稱號又唔係代表一切，人妻都可以有自己事業」，不過要創事業，自然要丈夫的配合，她坦言：「我好感恩，始終同幕前人相處﹑結婚，不是容易的事，要大家體諒﹑調整﹑遷就，真係好感恩。」

這2年可謂歷盡人生高低起跌，小產的傷痛全賴丈夫一直陪伴，年初時Kary在網上寫道：「謝謝你，當我流淚的時候，細心聆聽之後給我一個擁抱。謝謝你，當我沒有勇氣的時候，說要牽著我的手一起走。謝你，永遠把最好的東西留給我。」這些經歷比甜言蜜語來得珍貴，回想起來，她坦言丈夫訂婚時的舉止已經令她感動萬分，「當時我處於事業高峰，但佢顧慮到我嘅事業，怕我會受結婚阻礙，訂婚後都問我，需唔需要推遲結婚，真係好細心，好Take Care我。」

其實，婚姻關係重點在於「付出」，因此Kary亦為丈夫作出根本改變，「我工作上冇咁追求了，某程度係一種遷就，結婚後唔想做一個工作狂的太太，冇咗以前果種一定要得到的感覺，唔代表我冇咗事業心，只是拿個平衡，休息時冇掂到音樂任何嘢，反而去體驗其他事情﹑去旅行﹑找興趣，估唔到自己會鍾意種植物﹑學日文，人生原來有其他興趣！搵到興趣後，做返音樂會有返火喎！」

30歲後發現，人生好多嘢重要過搵錢，休息時做多咗義工，令我多左滿足感，30歲至40歲，希望可以放多啲時間做慈善，體驗更多吧！

在香港做歌手確實不易，部分歌手要倚靠拍劇做主持工作才能幫補生計，更何況是像Kary一樣，只專注音樂的歌手，她想了想道：「我有同朋友傾過，我話前幾年覺得做音樂變左『做嘢』，冇咗開始時的Passion，其實真係好危險，因為唔想興趣變左例牌做嘢的感覺，舊年休息對我好緊要，現在出返嚟唱，發現原來我都好掛住唱歌！」

歌手必須在音樂上尋找突破，2013年Kary曾自己參與創作，成就了《State of Mind》專輯，記錄低自己的心路歷程，她憶述：「其實呢張專輯係我入行最喜歡的專輯，自己搞晒真係好痛苦，但我好享受過程，最代表到自己，未來有更多時間，可以做呢類專輯就最好！」

現階段的Kary完全是「憑感覺」造歌，她笑言：「我已經2年冇出歌，一直想找新音樂試下，Alex fung 一直都有畀demo我，但一直未感動到我，直至《Come with me》的melody出現，好形容到我現在的心情，很有tgif的感覺，做音樂咁多年，每次都想有突破，但依家嘅階段真係唔想太多計算，所以決定要呢首歌。」歌曲特別之處，是由Alex Fung先創作Melody，再交由藍奕邦先後5次填詞，「歌詞睇落好簡單，但越簡單越難填，今次melody好強，歌詞不能太蓋過音樂，填詞反而更難，其中一句『捨棄未來﹑擁抱片刻』，呢句好形容到我。」

歌迷好錫我，願意接受我唔同改變，我風格改變係想話畀佢哋聽，我想用自己能力令樂壇有不同選擇，而不是只有一種曲風！

提到Kary不同階段都有音樂突破，她笑言：「我覺得同人生經歷有關，我音樂裡最想將真實一面給歌迷睇到，我好坦白話畀歌迷聽，我生命中發生緊咩事，最近要準備內地演唱會，聽返樂隊《PingPong》的作品，現在唱不來了，18歲的少女才有那團火，現在是另一種感覺。」

「沒有計劃」的Kary，除了與音樂監製Alex Fung合作推出了新歌外，並未有考慮今年內推出新專輯，更沒有計劃在香港舉行演唱會。「好多人問我幾時開，我都好掛住，我覺得紅館係歌手成長的地方，經歷由準備演唱會到正式站上台，係一個成長過程。今年都唔會了，今年在內地有幾場演唱會，希望內地演唱會熱熱身，看看下年會怎樣！」

說到這裡，Kary又提起自己造歌時的樂趣，好希望與Alex Fung保持輕鬆的工作環境，「佢係一個香港少有的個性監製，明白市場需要啲乜，我入錄音室好需要熱身，今次唱45分鐘就完成錄音，我好掛住錄音室，2年冇入過去了。我想同Alex fung keep住呢種曲風，我唔會排除再唱情歌，但想做新啲嘅吳雨霏音樂。」

這2年的休息時間，對Kary最大的轉變是什麼？原來就是做義工了。「第一次影響我係去蒙古做義工，好多時候話我地去蒙古幫人，但其實我覺得倒頭來係，佢地生活會影響我地！7日冇沖涼，你唔會記得，因為佢地2個月都冇得沖，所以你唔會覺得辛苦。」

與其說結婚令女人改變，倒不如說，人生閱歷讓人進步。

Makeup：Jessicachan_makeup
Hair：Sing Tam@pi4.hk
Outfit：MO&Co.
Venue：如心艾朗酒店L'hotel élan