【專訪】劉美君做歌講感覺好「任性」：覺得自己好乞人憎！
如果在香港樂壇上位位歌手都有自主性，喜歡唱什麼就唱什麼，不需要被唱片公司控制歌手選曲，不需要被經理人公司控制打扮，私生活自由，不知道樂壇會不會更健康呢？有人會說這類的藝人管理方針會埋沒歌手的專長，但也有人會說要是這樣的話香港的歌手更沒有生存空間。有一位樂壇歌姬似乎不在乎種種公司規則，以自己為先的方式得到大家對她的音樂認同，連她所屬的唱片公司也願意給她放手一試，連她也承認自己是一個「任性」的歌手，她向來忠於自己，說她喜歡說的話，做她喜歡做的音樂，而且對她來說，做音樂與做愛的概念相近，同樣需要一鼓衝動，她就是樂壇最年輕嫲嫲，劉美君。
攝影：黃國立
化妝：Kris Wong
髮型：Gary Sun @Hair Corner（Central）
場地：KEF Music Gallery
最近劉美君（Prudence）首次推出全英文發燒專輯《Reincarnated Love》，專輯收錄了十首由Prudence精心挑選的英文經典金曲，並以現場即興同步錄音這種高難度方式收錄，簡單說就是與樂手即場jam並一take過的方式錄音，要達到發燒專輯要求可以說是難度極高。談到今次首推發燒專輯的準備過程，Prudence表示：「其實我做嘅任何一樣嘢都無plan過，我個人就係咁，今次出發燒專輯只不過係以前無做，依家想做，所以之前先後推出國語及廣東大碟，而英文歌就想save the best for last，所以依家做埋英文歌。」
今次Prudence的英文發燒專輯《Reincarnated Love》，找來了頂尖的樂手彈奏，又與HIFI德（劉賢德）合作，可以說是夢寐以求，而且並不是個個歌手都能夠要求唱片公司找來此團隊，Prudence謂：「我唔知可唔可以話自己好彩，我真係無諗過呢個問題，我做嘢係幾隨心，我以前（出道時）頭嗰7年真係唔容許，因為合約問題，但我依家唔係當時嘅我，依家做音樂係講求我想唔想，我鍾唔鍾意。曾經公司有叫我出國語碟，出英文碟等，但我都一一拒絕，原因係我係一個以家庭為先嘅人，當年我係一個媽媽，一個太太，所以家庭對於我係好重要。但我永遠都會畀自己一個平衡，既然當年，我無畀自己Extra嘅時間去做我想做嘅嘢，依家我有時間，我有feel，自然會做。其實我生出已經係咁自我，以前試過因為合約條款令我唔開心，我知道以前嗰種係唔work，所以當我2008年回歸香港樂壇同呢間唱片公司（環球唱片）合作，我好開心，佢唔會逼我幾多年要出幾多隻碟。」
Prudence的英文發燒專輯《Reincarnated Love》內共有十首經典英文歌曲，所有歌曲都是Prudence都是她即興選擇。「我鍾意嘅歌好多，但係唔係所有歌我入到studio同啲樂手jam出嚟就鍾意呢？我可以同你講，絕對唔係！你以為好聽嘅嘢，你諗同你做出嚟係兩件事，所以我今次錄呢隻碟之前就決定，如果我哋jam出嚟嘅嘢唔好聽，就算已經錄咗，我都係會唔要。所以呢十首歌係喺好多首歌入面揀出嚟。我講完呢番話都覺得自己好黑人憎，好任性。」說罷Prudence也忍不住大笑。
Prudence續說：「其實呢隻碟喺2015年開始做，做到2016年，由另外一樂手同我一齊做，當嗰一年所做嘅嘢我係全部無要。其實2015年，係好似以往做音樂咁，搵編曲人預先編畀我聽再去做，但我覺得唔work，所以之後我先決定做即興音樂。當時我就決定飛番嚟香港3次，睇下當時邊個樂手有時間，然後jam歌，前後都jam咗40首歌。」
「我係一個活喺自己世界嘅人，我形容自己係一匹不羈嘅馬，人哋想我做嘅嘢，我係唔會聽，只有會做自己開心嘅事。我其實好細個已經係咁，我同我身邊嘅同學好唔同，不論思想或睇法都唔同。而慢慢大咗出嚟做嘢咁多年，我覺得身邊合作嘅人都好包容我，好縱容我，對我好有耐性，但當然我所做嘅音樂都唔係亂嚟，我都係一個有理性去任性嘅人。」劉美君笑言。
對劉美君來說，做任何事包括音樂，都與性愛的概念很接近，都是源於一種衝動，她坦言：「我成日都咁講嫁，我同啲音樂人講，我同佢哋made out（親熱），我同佢哋都講，啱啱首歌好正，好似同你made out咁。That's what I need，音樂就係需要做愛嗰份passion（激情），仲有mood（心情）。」
劉美君今年除了推出發燒專輯，她更將會在十月紅館舉行她的演唱會，今次演唱會劉美君將與高世章一同擔任創作總監，著名音樂監製趙增熹則擔任音樂總監：「我知道我自己喺舞台上未有代表作，所以我做呢個騷我將會參與好多音樂上嘅編排，我個演唱會亦會放好多戲劇性嘅情節喺入面，如果大家有睇過我之前嘅演唱會，你會知道我開演唱會係唔會講嘢，唔會吊威也，唔會做人地期望我做嘅嘢，因為我身為一個觀眾，入嚟係鍾意睇真正嘅劉美君，聽佢唱歌。」