【專訪】爛聲照錄音監製藝琛拍枱鬧　J.Arie：真係唔想㗎嘛大佬！

攝影：梁碧玲　黃浩晉

雖然J.Arie參與今次《我不怕唱歌》，但其實入行第2、3年，佢都怕過唱歌，仲覺得當時有啲「一蹶不振」。J.Arie表示：「好辛苦呀！嗰一年有少少一蹶不振feel，試過做節目做到喊，成年都係咁。 入行第2年，踏入第3年嗰個階段時間係怕過唱歌。」

J.Aire形容自己當時係「衝出嚟嘅o靚仔」，對每一樣嘢擺到自己個期望好高，成日好想有回報；到入行第二年發現自己又跟不上外界的要求，心情非常波動。

到入行第三年情況更差，斷斷續續病咗成年，聲音狀態冇好過，情緒跌到落谷底，J.Arie話：「唯有硬住頭皮，沙聲呀，唱幾take又冇聲呀，咁樣習慣咗呢一種低谷嘅情況，踏入16、17年，個身體機能又好轉番，個人又開心番。」佢講到：「雖然Artist係好情感牽連嘅動物，但係我都好希望可以個人平和一啲，EQ好一啲。」

雖然J.Arie心情與身體狀況都跌落低谷，幸好可以向身邊嘅監製藝琛大吐苦水；不過拍住藝琛原來好大壓力，J.Arie仲試過俾藝琛爆粗鬧。J.Arie話：「儘管已經唱咗4、5年，每一次錄一隻新歌都係新挑戰。同埋佢(藝琛)每一次都會X我嘅，每一次少不免有呢個過程，每一次錄音錄到忟，錄到鬧『點你個狀態又會係咁㗎！』不過呢一年好啲喇，之前仲係拍檯鬧！」雖然過程辛苦，但錄出嚟嘅成果過到自己嗰關就乜都抵番晒，《冰島》 係佢暫時最滿意嘅作品，而且亦係最花時間。

J.Arie聲線狀態差仍然硬住頭皮錄音，但照樣要俾監製鬧，J.Arie諗起都好激動：「係呀！喂！我真係唔想㗎嘛大佬！但係身體唔聽話，病完一次第二個月又病過，自己都好嬲自己！但係一齊做嘢、錄親音又會俾監鬧『點搞呀你！』都會忟嘅！」

近來J.Arie較多幕前演出，會否因此忽略音樂，失去時間創作？答案竟出人意表：「反而唔係喎！其實要拍係用好少時間㗎！基本上，上年我有大部份時間我係匿咗喺Workshop度寫歌，錄音室度錄歌。其實我仲有一啲存貨喺到未推出嚟，真係爭拍埋個MV就可以推出，今年希望可以將之前一路寫落啲Demo真係可以成事。」

J.Arie透露將會有一段時返內地，但仍然希望演唱廣東歌：「我希望係帶廣東歌俾大家，我唔會忘記個語言，即使佢好難唱。」早前不少香港歌手都參加過內地選秀節目，但因為語言問題被淘汰，J.Arie會否對此有顧慮？佢表示：「呢啲顧慮唔到我諗，呢一個階段我認為有咩歌最能夠表現我嘅感受，同埋我擅長去演繹，而我能夠賦予一個新生命畀呢首歌，我就會唱。我冇諗太多一定要我唱國語歌就去唱國語歌。你想冇咁玩自己嘅話咪揀國語囉，但係我覺得廣東話呢個語言一定要帶去有華人嘅地方，我首選係廣東話。」