推輪椅婆婆上巴士!女車長1原因無法落板 阿伯怒罵:叫你落就落

撰文:李納德
出版:更新:

年廿九吃團年飯後,許多市民都趕回家迎接農曆新年,但乘搭交通工具也要守規矩!網上流傳影片,拍到1名阿伯推着輪椅婆婆在香港仔巴士站大吵大鬧,阿伯走上巴士要求女車長落輪椅板斜以便推妻子上車,但車長指因為站頭有死車塞住未能正式埋站,當時身處路中,該位置沒有路壆而無法落輪椅板,勸他等候下一班車或到下一個站上車。惟阿伯激動發難,不斷喝罵指「架車可以放低㗎,唔好蝦我呀」、「我叫你落,就落,我負責任」。

現場相繼有途人及乘客勸阻阿伯,更有熱心女子勸他先帶婆婆返回行人路,「去嗰度先落到輪椅㗎,我哋都係落輪椅㗎,佢呢度落唔到(輪椅板)㗎」,詎料反阿伯喝罵「唔好講嘢,我報警」,終累及巴士無法開出。警員到場後耐心解釋情況,勸說轉坐下一班車,但阿伯仍情緒激動說「唔得,我一定要上呢架,我係要玩到佢盡為止」,幾經辛苦才帶他返上行人路調停。

網民認為女車長已清楚解釋情況,狠批阿伯野蠻,「反社會人格」、「個老公仲要推個老婆去車頭擋人車」、「呢啲老頑童真係」。

阿伯站在車門位置,要求車長馬上落輪椅斜板,「我叫你落,就落,我負責任」。(影片截圖)

巴士停車處無路壆不能落輪椅斜板

有網民在facebook群組「巴士的事討論區~更新版」上傳2條影片,指「新年流流,為何搞到大家唔開心呢」。綜合影片內容,事發現場是香港仔巴士總站,1名阿伯想推坐輪椅的妻子登上前往長沙灣的城巴970X,但當時巴士身處行人過路處前的路中,並非停在巴士站旁,女車長指該位置沒有壆位,輪椅斜板不夠長無法落板,又因為當時有另1輛巴士頂住,所以無法正式埋站,以安全為由勸對方多等一會,在輪椅位上巴士,或轉到漁暉道車站上車,但阿伯發難報警,令巴士無法開出。

阿伯想自行拉出輪椅斜板,車長馬上勸阻。「我叫你落,就落,我負責任」。(影片截圖)
+2

阿伯企圖自行落輪椅斜板

事發於年廿九(1月28日)晚上,影片所見,阿伯站在車門指着女車長大喝「快啲」,又想自行拉出巴士的輪椅上落斜板,車長連忙說「你唔好搞呀,唔得自己落呀,唔得咁樣㗎」。阿伯大聲說「唔得咁你咪落板囉」,車長表示要報警,阿伯即走近駕駛座旁說「報警都冇用㗎」,車長見他走到身旁,即叫「你唔好行埋嚟」,阿伯回應「我唔掂你」。

車上乘客上前勸阻,阿伯拿出手機示意要報警。(影片截圖)
穿粉紅色衣服的熱心女途人上前解釋情況有危險,勸阿伯先推婆婆回行人路。(影片截圖)
阿伯喝罵粉紅色衣服的女途人,表示「唔好講嘢,我報警」。(影片截圖)
+2

阿伯:我叫你落,就落,我負責任

車長解釋該停車位置因沒有壆位而無法落輪椅板,但阿伯沒聽進耳,反而再大喝「叫車長(應指站長)嚟」,車長感好奇「叫邊個車長呀,呢度冇站長」。有其他市民途經了解,阿伯稱「我上車,佢話唔落得板」、「架車可以放低㗎,佢唔好蝦我呀」、「我唔理你,你落唔落」、「我叫你落,就落,我負責任」,但市民聽完車長解釋後也認同「你咁搞好危險喎」、「佢要埋到個壆位先落得(斜板)」。

此時車上乘客也支持車長「黐線㗎,X你老X,報警啦」,另1名女乘客上前勸阻,「算啦哥哥,算啦,唔該你啦」。阿伯不理會眾人勸說,反而拿出手機示意要報警,又喝斥「我趕時間呀」。1名途經的熱心女子勸阿伯帶婆婆返回行人路,「去嗰度先落到輪椅㗎,我哋都係落輪椅㗎,佢呢度落唔到(輪椅板)㗎」,阿伯卻反斥女途人,稱「唔好講嘢,我報警」。女子再耐心說「呢度落唔到㗎」,阿伯朝她臉大喝「唔好講嘢」,對方也大聲回應,「太高啦呢度」,之後被其他途人拉開。

車長向其他乘客解釋情況,但被婆婆喝罵「唔好再講咁多嘢啦你!」。(影片截圖)

輪椅婆婆喝車長:唔好再講咁多嘢啦你!

看到伯伯不聽人勸告的態度,車上一眾乘客愈發不滿,「咁X燥,咁㒼塞」、「係咪飲咗酒呀」、「大家安全先好」,車長向眾人解釋,因為上車地點被另1輛巴士塞住,「報警都冇辦法啦」、「我埋唔到去啦」,又叫阿伯「你喺輪椅位嗰度等,後車就上到」。一直未有發聲的輪椅婆婆此時向車長大喝「唔好再講咁多嘢啦你」、「冇理由呀嘛,唔上得車嚟咩」。

車長解釋,要正式埋站有壆位才可以落輪椅斜板,當時車站有另1輛巴士頂住(應為圖中巴士),故無法埋站落板上客。(影片截圖)

警員勸坐下班巴士 阿伯:唔得,我一定要上呢架

另1條影片拍到,1名相信為巴士公司職員及2名警員到場調停,職員希望盡快解決事件讓乘客乘車回家。警員勸阿伯婆婆上後1輛巴士,「佢開㗎啦,呢架」。惟阿伯態度堅決稱:「唔得,我一定要上呢架,我係要玩到佢盡為止。」警員指要跟從巴士公司守則「咁都冇計」,阿伯堅持「咁上到為止囉」。

警方到場勸阿伯坐下一班巴士,指該巴士馬上就要開出,但阿伯仍拒絕。(影片截圖)
阿伯拒絕坐下班巴士,稱「唔得,我一定要上呢架,我係要玩到佢盡為止」。(影片截圖)
+2

輪椅婆婆:好聲好氣我都冇咁火滾呀嘛

其後1名較高的男警入鏡,叫阿伯先讓後一班巴士開車,阿伯卻將婆婆推到受阻巴士車頭位置。現場所見,巴士站仍有不少市民正等巴士,而男警員帶阿伯返回行人路協商,坐輪椅的婆婆則和另一名男警員聊天,此時多名巴士乘客選擇下車離去,婆婆態度略為激動指「好聲好氣我都冇咁火滾呀嘛」。

警方表示,1月28日晚9時半左右收到報案,1名6旬老翁想推坐輪椅的妻子上巴士,和車長發生爭執,列作糾紛處理。

網民撐車長:仲推個老婆去車頭擋人車

網民認為車長已清楚解釋為何不能落斜板,認為阿伯野蠻,「反社會人格,唔搞事會身痕」、「壞人變老了」、「架巴士斜板唔夠長落唔到平地,要喺個壆,上面候車區先得,梗係兩蚊大帝唔啱,前巴士公司車長」、「人哋撈低埋架車都斜台太斜上唔到喇!個老公仲要推個老婆去車頭擋人車,都唔知話佢愛妻心切定推老婆去咩好」,但也有人認為「支持研究車頭上落升降台」。

正在加載