【周末好去處】海洋公園黃昏免費入場　睇住煙花嘆啤食串燒

Happy Friday大家當然想準時收工，同Friend子去飲杯嘢鬆一鬆，如果有得一路飲嘢，一路睇住煙火表演，聽下Live Band，應該Chill到核爆！

海洋公園推出全新「Chill Out」夜間湖畔餐飲體驗，今日起至6月29日期間嘅每個周五及周六晚，遊人可以免費進入園區，在海洋公園湖畔噴泉嘆美酒佳餚。遊人仲可以用$20飲到麒麟生啤（每人限購兩杯），抵返入黃竹坑嘅車費啦。

日本生啤最好配串燒，呢度一樣有，「珍寶串燒拼盤」最豐富，京蔥燒澳洲和牛、燒北海道五花豚肉、燒翡翠螺、燒鮑魚及燒日本珍寶帶子通通一網打盡。亦有燒大啡菇及燒日本番薯等冇咁Heavy嘅選擇。「摩天輪脆脆拼盤」造型夠Fancy，包含鹹蛋黃雞翼、脆炸魚柳、炸芝士豬手粒、番薯條、脆炸蔗蝦等邪惡小食。

山長水遠來到海洋公園，重點當然係煙火表演。晚上8點在「夢幻水都」人工湖會上演「雙龍奇緣」煙火和水幕匯演，現場又有DJ和樂隊到場表演，還有Beer Pong、巨型層層疊等遊戲免費任玩。今晚真的要爽啲手做完嘢趕去睇show喇！

詳情：逢周五及周六晚上6時30分至11時，免費入場，屆時公園只開放食尚水都、海龍王餐廳、水都餅店及海濱禮品廊，其他動物設施、機動遊戲和景點並不開放。

圖片由海洋公園提供。