【2018米芝蓮推介】新上榜3間地道小店 推介拔絲排骨、頭抽雞...
秋冬時分，食小炒和煲仔飯就最適合！本年度米芝蓮指南共有82間餐廳榮獲「米芝蓮車胎人美食推介」，包括73間香港餐廳及9間澳門餐廳，香港17間新上榜餐廳中，大部分是粵菜小炒、潮州菜、粥麵店等等。記者精選3間港式地道小店，分別是太子聚興家、西環坤記煲仔小菜及深水埗增煇藝廚，看看有什麼好味的菜式值得一試！
攝影：韓詠儀
聚興家
行家光顧似考試 外籍教授為水煮牛慕名而至
位於太子的聚興家，開店約6年，近年只做晚市，小小店舖卻是行內不少名廚的消夜去處，例如四季酒店、海景嘉福酒店等的總廚都曾光顧。吳江橋既是老闆，亦是餐廳大廚，習廚近20年，「以前日日做16、18個鐘，由無客做到有客，都有啲滿足感！自己廚房出身，登上米芝蓮係好多廚師嘅願望。」
好多大師級師傅過來食，好似考試咁，好驚㗎！
除了同業大師，香港科技大學（UST）電腦系的教授Michael也慕名而至，「我最鍾意食辣，睇報紙知道呢度嘅水煮牛肉好出名，所以專登嚟試！」水煮牛肉是聚興家的招牌菜式，還有酸菜魚、鹽烤雞等，記者特別推介酸菜魚，魚肉滑溜少骨，湯底清甜，以川式做法，用潮州鹹酸菜配上泡椒和指天椒更惹味。
此外，拔絲生炒骨也非常出色，件件「拉絲」，皮脆肉不乾，可見功架！吳師傅指，醬汁最難做，不同於用西芹或番茄煮汁，他是用傳統糖醋汁，特別酸甜滋味。
按圖看清「聚興家」招牌菜......
鍾意佢每次煮出味道都好一致，大碟抵食！我有時一星期去3、4次，試過一日之內食2次！朋友聚會、生日都會挑這間餐廳。
不過，由於餐廳舖面細小，座位只有40多個，想一試吳師傅的手藝，須預訂或碰碰運氣。
聚興家
地址：太子砵蘭街418號地舖
電話：2392 9283
坤記煲仔小菜
料足飯焦脆 記者推介白鱔煲仔飯
位於西環的坤記開業多年，煲仔飯街知巷聞，經常大排長龍。店舖由坤哥夫婦主理，煲仔飯只限晚市供應，即點即燒，「生米煮成熟飯」最少都要等半小時。
記者預早一天訂位，點了白鱔臘腸煲仔飯，上桌時吱吱作響，熱騰騰！白鱔肉甜軟嫩外，還帶有一股鮮味，難怪白鱔煲仔飯售價$100亦很多捧場客。煲仔飯飯粒分明，飯焦能輕易挖出，愈嚼愈香。
以前吃過幾次，鍾意食雙腸煲仔飯，飯焦做得好好，因為用啲油抹係鍋底先煲，唔黏底，所以今次帶埋屋企人嚟食。
從加拿大回港探親的歐陽女士，大讚坤記的煲仔飯有水準，雖然價錢比一般高，約$80至$105，但她說：「而家食碗魚蛋粉都30、40蚊！呢間有質素，都值得。」首次光顧的食客更大讚：「未試過咁靚嘅煲仔飯！」
按圖看清「坤記煲仔小菜」招牌菜......
除了遊客，光顧的多是附近的學生和街坊熟客。高陞街經營中藥採購的老街坊蘇先生透露，「一星期都會和其他街坊來3、4晚，食咗幾十年，餐牌上的所有食物都試過！鍾意呢度鑊氣夠，飯焦香口，加少少甜豉油食最正！不過一定要預先頂位，太早無人聽電話。」其他街坊亦笑指：「事頭婆好有性格，假如你趕時間又想吃，就會叫你唔好等，好多一大班人嚟都等唔到位。」
坤記煲仔小菜
西環西營盤皇后大道西263號和益大廈地下1號舖
電話：2803 7209
增煇藝廚
難忘花甲胡椒豬肚湯 大牌檔風味蔡瀾都讚
深水埗的大牌檔不少，開業18年以上的「增煇」便是其中少有能保留「坐街」風味的大牌檔，菜式更獲著名食家蔡瀾推介。增煇的新舖和舊舖隔着一條馬路，舊舖的廚房在馬路邊。
不少人指明要坐路邊，鍾意坐街夠風味，一邊飲酒，一邊睇住師傅炒菜。而家擺街已經不多，以前最多時可以擺成20幾張枱㗎！
按圖看清「增煇藝廚」招牌菜......
增煇藝廚的招牌菜包括頭抽雞和鬼馬炸油條。頭抽雞用新鮮雞即點即浸，選用孖記頭抽，每日限賣10隻，皮色亮麗，肉嫩多汁。鬼馬炸油條，即把墨魚膠釀入油炸鬼中，炸得香脆，配搭酸甜汁，吃了數件亦不覺油膩。
記者推介花甲胡椒豬肚湯，這道菜並不是間間餐廳都做得好，花甲大隻無沙，鮮甜肥美，湯由豬骨熬成，胡椒辣而不嗆喉，秋冬喝一碗，暖入心。光顧十多年的何太推介黃金鮮魷和薯仔牛柳粒，「最鍾意呢度小菜夠鑊氣，小炒送酒一流，價錢唔覺得貴，新舖乾淨，坐得舒服一點。」
增煇藝廚
地址：深水埗石硤尾街31-33號地舖
電話：2778 8103
按圖看73間米芝蓮推介名單（紅字為新上榜餐廳）：